ករណីលោក ផន សុភាព ប្រធានការិយាល័យអប់រំស្រុកកូនមុំប្រព្រឹត្តអំពើពុករលួយកេងប្រវ័ញ្ចថវិការដ្ឋតាមអំពើចិត្ត កំពុងធ្វើឲ្យគ្រូបង្រៀននៅស្រុកកូនមុំខេត្តរតនគិរីបញ្ចេញប្រតិកម្មយ៉ាងខ្លាំង។ ទោះជាយ៉ាងណាអ្នកស្រី ច័ន្ទ ខាំឃឿ ប្រធានមន្ទីរអប់រំនិងកីទ្បាខេត្តរតនគិរី មិនចាត់វិធានការទៅលើលោក ផន សុភាព នោះទេ ហើយនៅតែបណ្តោយឲ្យលោក ផន សុភាព ព្រមទាំងបក្ខពួកធ្វើអ្វីៗតាមអំពើចិត្ត។ ចំណុចនេះក្រុមគ្រូបង្រៀនក្នុងស្រុកកូនមុំបានរិះគន់ថាទំនងជាអ្នកស្រី ច័ន្ទ ខាំឃឿ ខ្លាចបាត់បង់ផលប្រយោជន៍ផ្ទាល់ខ្លួនទើបបណ្តោយឲ្យលោកផន សុភាព ប្រព្រឹត្តអំពើពុករលួយយ៉ាងគឃ្លើន។
លោកគ្រូ អ្នកគ្រូជាច្រើននាក់នៅក្នុងស្រុកកូនមុំ ខេត្តរតនគិរី បានឲ្យដឹងថាដោយមានការជួយបិទបាំងពីអ្នកស្រី ច័ន្ទ ខាំឃឿ ទើបលោក ផន សុភាព និងបក្ខពួកហ៊ានធ្វើអ្វីៗស្រេចតែអំពើចិត្តមិនខ្លាចចំណាត់ការកែទម្រង់របស់លោក ហង់ ជួនណារ៉ុន ជារដ្ឋមន្ត្រីក្រសួងអប់រំយុវជននិងកីទ្បានោះទេ។ ជាងនេះទៅទៀត នៅពេលដែលក្រុមអធិការកិច្ចក្រសួងអប់រំចុះទៅស្រាវជ្រាវរាវស្ទាបរកអំពើពុករលួយនៅក្នុងមន្ទីរអប់រំខេត្តរតនគិរីនិងការិយាល័យអប់រំស្រុកកូនមុំ គឺគេគ្រាន់តែចំណាយលុយញ៉ុកមាត់ក្រុមអធិការកិច្ចទាំងនោះជាការស្រេច។ បញ្ហានេះលោក ហង់ ជួនណារ៉ុន រដ្ឋមន្ត្រីក្រសួងអប់រំមិនត្រូវមើលរំលងតទៅទៀតទេ ព្រោះលោក ផន សុភាពនិងបក្ខពួកដូចជាឈ្មោះ ឈីវ គឹមសាយ, ឈ្មោះ វណ្ណ វុធ និងឈ្មោះ សុំ ប៊ុននៃ កំពុងធ្វើអ្វីៗតាមអំពើចិត្ត។
ក្រុមគ្រូបង្រៀនបានលាតត្រដាងថា ក្នុងចំណោមអំពើពុករលួយរបស់លោក ផន សុភាពនិងបក្ខពួកមានដូចជាការក្លែងបន្លំហត្ថលេខាគ្រូបង្រៀនក្នុងឆ្នាំ២០១២-២០១៣ ដើម្បីសុំប្រាក់ឧបត្ថម្ភព្យាបាលជំងឺរាប់រយនាក់ ដោយគ្រូបង្រៀនទាំងនោះមិនបានដឹងខ្លួនទាល់តែសោះ។ គ្រូបង្រៀនដែលគេក្លែងហត្ថលេខានោះមានឈ្មោះដូចជា ហ៊ឹម គឹមសាន, កែវ សុកន, ទ្បាយ សំណាង, ឃុត អឿន, ពិ ចាន់ធា, យឹម ច័ន្ទសុភក្ត្រ, ខឿន សុភាព ជាដើម បើគិតពីថវិកាគឺរាប់សិបលានរៀលឯណោះ។ បញ្ហានេះលោក ហង់ ជួនណារ៉ុន ដែលជារដ្ឋមន្ត្រីក្រសួងអប់រំយុវជននិងកីទ្បាមិនត្រូវមើលរំលងតទៅទៀតទេ ហើយត្រូវតែចាត់វិធានការតាមច្បាប់ទៅលើអ្នកស្រី ច័ន្ទ ខាំឃឿ និងលោក ផន សុភាព ព្រមទាំងបក្ខពួកជាបន្ទាន់៕
