ខេត្តកំពង់ឆ្នាំង៖ តាមសេចក្តីរាយការណ៏បានបញ្ជាក់ថា មានឈ្មួញនិងក្រុមជនល្មើសចេញមកពីអតីតកម្មករផ្លូវរទេះភ្លើងរាជាយស្ម័យយានកម្ពុជានៃក្រសួងសាធារណការដឹកជញ្ជូន បានធ្វើសកម្មភាពទន្ទ្រានកាន់កាប់ដីចំណីផ្លូវដែករទេះភ្លើងសាធារណះរបស់រដ្ឋតាមបណ្តាយផ្លូវរទេះភ្លើង នៅ ភូមិ ភ្នំតាសាំ ឃុំក្រាំងស្គា ស្រុកទឹកផុស ខេត្តកំពង់ឆ្នាំង បានកើតឡើងច្រើនខែមកហើយ ប៉ុន្តែមិនឃើញលោក ឈួរ ច័ន្ទឌឿន អភិបាលខេត្តកំពង់ឆ្នាំង និងលោក អភិបាលស្រុកទឹកផុស ព្រមទាំងមេឃុំក្រាំងស្គា មិនមានចាត់វិធានការទប់ស្កាត់ឡើយ ដោយសមត្ថកិច្ចអាជ្ញាធរឃុំក្រាំងស្គានិងអភិបាលស្រុកទឹកផុសហាក់បីមានការឃុបឃិតជាមួយឈ្មួញនិងក្រុមជនល្មើសទាំងនោះ គឺបណ្ដោយឲ្យក្រុមឈ្មួញនិងក្រុមជនល្មើសធ្វើសកម្មភាពទន្ទ្រានកាន់កាប់ដីចំណីផ្លូវរទេះភ្លើងសាធារណរបស់រដ្ឋធ្វើជាកម្មសិទ្ធបុគ្គលនិងលក់បន្តទៅឲអ្នកដទៃទៀត តាមតែអំពើចិត្តដែលមិនចាត់វិធានការបង្ក្រាបនិងទប់ស្កាត់ឡើយ។
លោក អភិបាលស្រុកទឹកផុសនិងអាជ្ញាធរឃុំក្រាំងស្គា ក៏មិនចាត់វិធានការបង្ក្រាបបទល្មើសទន្ទ្រានកាន់កាប់ដីចំណីផ្លូវរទេះភ្លើងដែលកំពុងកើតឡើងយ៉ាងពេញបន្ទុកនោះដែរ។ តាមសេចក្ដីរាយការណ៍ពីប្រជាពលរដ្ឋបានឲ្យដឹងថា បច្ចុប្បន្នក្រុមឈ្មួញនិងក្រុមជនល្មើសមិនបញ្ឈប់សកម្មភាពក្នុងការទន្ទ្រានកាន់កាប់ដីចំណីផ្លូវសាធារណរបស់រដ្ឋស្ថិតក្នុងភូមិភ្នំតាសាំ ឃុំក្រាំងស្គារ ស្រុកទឹកផុស នៅតាមបណ្តាយផ្លូវរទេះភ្លើងនោះទេហើយមន្ត្រីអាជ្ញាធរស្រុកទឹកផុស និងមន្ត្រីធំៗមួយចំនួនក្នុងខេត្តកំពង់ឆ្នាំង គឺជាអ្នកពាក់ព័ន្ធនឹងបទល្មើសទន្រ្ទានកាន់កាប់ដីចំណីផ្លូវរទេះភ្លើងជាមួយឈ្មួញនិងក្រុមអនាធិបតេយ្យដើរចាប់ដីរបស់រដ្ឋយកទៅលក់នោះតែម្តង។
ប្រជាពលរដ្ឋបានឲ្យដឹងថា ដីព្រៃចំណីផ្លូវរទេះភ្លើង រាប់រយហិកតានៅចំណុចភូមិភ្នំតាសាំ ឃុំក្រាំងស្គារ ស្រុកទឹកផុស បានកំពុងក្លាយទៅជាកម្មសិទ្ធិឯកជនជាបន្តបន្ទាប់ហេីយ។ មេឃុំក្រាំងស្គារ និងអភិបាលស្រុកទឹកផុស ត្រូវប្រជាពលរដ្ឋរិះគន់ថាជាអ្នកឃុបឃិតឲ្យក្រុមឈ្មួញ ក្រុមជនល្មើសទន្ទ្រានកាន់កាប់ដីព្រៃចំណីផ្លូវរទេះភ្លើងរបស់រដ្ឋនេះតាមតែអំពើចិត្តដោយគ្មានញញើតអ្វីឡើយ។
ហេតុនេះហើយទើបពួកគាត់អំពាវនាវឲ្យថ្នាក់ដឹកនាំក្រសួងសាធារណការដឹកជញ្ជូន និងស្ថាប័នពាក់ព័ន្ធចាត់វិធានការទប់ស្កាត់ទៅលើក្រុមអតីតកម្មករផ្លូវដែកនិងឈ្មួញទាំងនោះប្រកបដោយប្រសិទ្ធភាពផង។ ប្រជាពលរដ្ឋបានរិះគន់ថាលោក ឈួរ ច័ន្ទឌឿន អភិបាលខេត្តកំពង់ឆ្នាំង លោក អភិបាលស្រុកទឹកផុស និងអាជ្ញាធរឃុំក្រាំងស្គារ គ្មានឆន្ទៈក្នុងការទប់ស្កាត់បទល្មើសទន្ទ្រានកាន់កាប់ដីចំណីផ្លូវរទេះភ្លើងនោះឡើយ។
ជាក់ស្ដែងរហូតមកដល់ពេលនេះដីព្រៃចំណីផ្លូវរទេះភ្លើងរាប់រយហិកតាក្នុងឃុំក្រាំងស្គារ ស្រុកទឹកផុស កំពុងក្លាយជាកម្មសិទ្ធិឯកជនយ៉ាងរលូន ចំណែកអភិបាលខេត្តកំពង់ឆ្នាំង និងមន្ត្រីពាក់ព័ន្ធបែរជានាំគ្នារក្សាភាពស្ងៀមស្ងាត់ធ្វើមិនដឹងមិនឮអ្វីទាំងអស់។ ដូច្នេះហើយទើបក្រុមឈ្មួញនិងក្រុមជនល្មើសកាន់តែបានចិត្តក្នុងការធ្វើសកម្មភាពទន្ទ្រានកាន់កាប់ដីព្រៃចំណីផ្លូវរទេះភ្លើងរដ្ឋដោយគ្មានខ្លាចក្រែងច្បាប់ទំលាប់អ្វីទាំងអស់៕ ជាបឋម