0

លោក ញឹក ប៊ុនលេខ មេគយច្រកបឹងត្រកួននៅតែល្បីល្បាញខាងប្រព្រឹត្តអំពើពុករលួយ!

ប្រភពពីសមត្ថកិច្ចពាក់ព័ន្ធនៅច្រកទ្វារតំបន់បឹងត្រកួន​ បានឲ្យដឹងថា រហូតមកដល់ពេលនេះលោក ញឹក ប៊ុនលេខ មេគយច្រកបឹងត្រកួន នៅតែប្រព្រឹត្តអំពើពុករលួយតាមអំពើចិត្តដោយគ្មានញញើតអ្វីទាំងអស់។ ប្រភពបានឲ្យដឹងទៀតថា ការដែលលោក ញឹក ប៊ុនលេខ មេគយច្រកបឹងត្រកួន ហ៊ានធ្វើអ្វីៗតាមអំពើចិត្តគឺដោយសារមានការសម្របសម្រួលពីមន្ត្រីគយធំៗមួយចំនួននៅក្នុងខេត្តបន្ទាយមានជ័យ ផងដែរ។ ដូច្នេះហើយទើបនៅច្រកទ្វារតំបន់បឹងត្រកួននិងច្រករបៀងក្បែរៗនោះមានឈ្មួញនាំចូលទំនិញគេចពន្ធ ទំនិញខុសច្បាប់ ទំនិញបង់ពន្ធមិនគ្រប់និងម៉ូតូអត់ពន្ធយ៉ាងអនាធិបតេយ្យ ព្រោះជាប្រភពចំណូលរបស់លោក ញឹក ប៊ុនលេខ មេគយច្រកបឹងត្រកួន និងបក្ខពួក។

ប្រភពស្និទ្ធនឹងលោក ញឹក ប៊ុនលេខ មេគយច្រកបឹងត្រកួន បានឲ្យដឹងថា ដោយសារមានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជាទើបលោក ញឹក ប៊ុនលេខ ហ៊ានធ្វើអ្វីៗតាមអំពើចិត្តរបស់ខ្លួនគ្មានញញើតអ្វីឡើយ។ ឈ្មួញធំៗមួយចំនួនអាចនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់តាមច្រកទ្វារតំបន់​បឹងប្រកួនយ៉ាងរលូន ហើយដឹកជញ្ជូនឆ្លង​ការផ្លូវជាតិលេខ៥​ ចូលមករាជធានីភ្នំពេញ យ៉ាងរាលដាលព្រោះមានការឃុបឃិតពីមន្ត្រីគយចល័តនៅតាមផ្លូវផងដែរ។ ចំណែកលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា បានរក្សាភាពស្ងៀមស្ងាត់ទោះបីរឿងអាស្រូវពុករលួយច្រើនបែបច្រើនយ៉ាងរបស់លោក ញឹក ប៊ុនលេខ មេគយច្រកបឹងត្រកួន ត្រូវបានលាតត្រដាងជាបន្តបន្ទាប់យ៉ាងណាក៏ដោយ។

បើតាមការអះអាងរបស់មន្ត្រីនៅច្រក់ទ្វារតំបន់បឹងត្រកួន មួយចំនួនបានឲ្យដឹងថាឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ ទំនិញខុសច្បាប់ និងម៉ូតូអត់ពន្ធសុទ្ធតែមានទំនាក់ទំនងជិតស្និទ្ធជាមួយលោក ញឹក ប៊ុនលេខ មេគយច្រកបឹងត្រកួន ទើបអ្វីៗអាចប្រព្រឹត្តទៅដោយរលូន។ ជាងនេះទៅទៀតកន្លងមកលោក ញឹក ប៊ុនលេខ មេគយច្រកបឹងត្រកួន ឃុបឃិតឲ្យក្រុមហ៊ុនមួយចំនួននាំចូលជ្រូកលើសចំនួនកំណត់ក្នុងច្បាប់អនុញ្ញាតពីទឹកដីសៀម ចូលទឹកដីខ្មែរយ៉ាងសុខស្រួលឲ្យតែឈ្មួញទាំងនោះបង់លុយតាមការកំណត់។ បញ្ហានេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរបណ្តែតបណ្តោយតទៅទៀតទេ ព្រោះលោក ញឹក ប៊ុនលេខ មេគយច្រកបឹងត្រកួន នៅតែសាងភាពល្បីល្បាញខាងពុករលួយយ៉ាងគឃ្លើន៕

ចុះផ្សាយក្នុង៖ ព័ត៌មានជាតិ
©២០១៣ រក្សាសិទ្ធ​គ្រប់​បែប​យ៉ាង​ដោយ​សារ​ព័ត៌មាន​ចាប់​ដៃ មិន​អនុញ្ញាត​ឲ្យ​ដក​ស្រង់​នូវ​ផ្នែក​ណា​មួយ​ នៃ​ការ​ចុះផ្សាយ​នេះ​តាម​រយៈ​ការ​បោះពុម្ព តាម​ប្រព័ន្ធ​អេឡិច​ត្រូនិច ផ្សាយ​តាម​រលក​ធាតុអាកាស សរសេរ​ឡើង​វិញ ឬ ចែកចាយ ដោយ​គ្មាន​ការ​យល់ព្រម​ជា​លាយ​លក្ខណ៍​អក្សរ​ពី​ចាងហ្វាង​ការ​ផ្សាយ​ឡើយ។

Recent Posts

©២០១៣ រក្សាសិទ្ធ​ដោយ​សារព័ត៌មាន​ចាប់​ដៃ | ទូរស័ព្ទ៖ 077 56 79 79 | អ៊ីម៉ែល៖ chabdainews@gmail.com

សហការផ្តល់ព័ត៌មាន៖ 077 56 79 79 | អ៊ីម៉ែល៖ chabdainews@gmail.com

បង្ហោះគេហទំព័រ​ដោយ MyWeb Services៖ | ព័ត៌មានបន្ថែម៖ 092 266 264 ឬ info@myweb-service.com