ភ្នំពេញ៖ អាជ្ញាធរខណ្ឌច្បារអំពៅ រាជធានីភ្នំពេញ នារសៀល ថ្ងៃទី២៧ ខែតុលា ឆ្នាំ២០២០នេះ បានបញ្ជាឲ្យផ្អាកសកម្មភាពហ៊ុមព័ទ្ធរបងដោយខុសច្បាប់ ដើម្បីយកច្រាំងទន្លេមេគង្គជាកម្មសិទ្ធិឯកជន នៅក្បែរកោះនរា។
សកម្មភាពហ៊ុមព័ទ្ធរបងស័ង្កសីនេះ កើតឡើងនៅភូមិក្បាលជ្រោយ សង្កាត់ព្រែកឯង ខណ្ឌច្បារអំពៅ នៅលើច្រាំងទន្លេមេគង្គប្រមាណ២០០ម៉ែត្រ ដែលអ្នកភូមិប្តឹងចោទប្រកាន់ថា បានបំពានយកដោយខុសច្បាប់។
យោងតាមរបាយការណ៍ពីមន្ត្រីសាលាខណ្ឌច្បារអំពៅ បានឲ្យដឹងថា ករណីសាងសង់របងដែកនេះ «មិនទាន់មានលិខិតអនុញ្ញាតសាងសង់ពីសមត្ថកិច្ចជំនាញ។ ដូច្នេះក្រុមការងារសម្រេចឲ្យម្ចាស់របងផ្អាកការសាងសង់របងជាបណ្តោះអាសន្នសិន រងចាំការដោះស្រាយទំនាស់ជាមុនសិន»។
របាយការណ៍ដដែលនេះ ដែលប្រជាពលរដ្ឋផ្ញើមកអ្នកសារព័ត៌មាន នាល្ងាចថ្ងៃទី២៧ ខែតុលា ឆ្នាំ២០២០នេះ បានលើកឡើងថា ម្ចាស់សំណង់របងនេះ មានឈ្មោះ លឹម វុទ្ធី ជាតំណាង ហើយបានទទួលស្គាល់ចំពោះការហ៊ុមព័ទ្ធយកនេះ គឺ «ជាមាត់ទន្លេ» ដែលច្បាប់ហាមឃាត់មិនឲ្យយកជាកម្មសិទ្ធិឯកជន។
ចំណែកឯកសារដដៃទៀត បានឲ្យដឹងទៀតថា អាជ្ញាធរខណ្ឌច្បារអំពៅធ្លាប់បានហាមឃាត់ និងរុះរើបង្គោលរបងសាងសង់លើទីតាំងនេះ ដោយចាត់ទុកជាសំណង់ខុសច្បាប់បំពានយកច្រាំងទន្លេ។
នាវេលារសៀលថ្ងៃនេះ គេសង្កេតឃើញថា ភាគីអ្នកទិញ មានលោក លឹម វុទ្ធី ជាតំណាង គឺអះអាងលើឯកសារលក់-ទិញ មានត្រឹមតែហត្ថលេខា និងត្រាមេភូមិ ដែលបានស្លាប់រួចទៅហើយ។ ចំណែកចៅសង្កាត់ព្រែកឯង គឺមិនមានវត្តមានចៅសង្កាត់ព្រែកឯងឡើយ៕
![](http://www.chabdai-news.com/wp-content/uploads/2020/10/122445228_3470860989661589_8541296103084761903_o-280x210.jpg)
![](http://www.chabdai-news.com/wp-content/uploads/2020/10/122475651_3470862019661486_6335307054135053243_o-300x170.jpg)
![](http://www.chabdai-news.com/wp-content/uploads/2020/10/122492690_3470862282994793_5070656128353386486_o-158x210.jpg)
![](http://www.chabdai-news.com/wp-content/uploads/2020/10/122545308_3470861166328238_4528704871316230897_o-280x210.jpg)
![](http://www.chabdai-news.com/wp-content/uploads/2020/10/122579141_3470863842994637_6883510861678678525_o-146x210.jpg)
![](http://www.chabdai-news.com/wp-content/uploads/2020/10/122581624_3470860776328277_2672636472882953166_n-300x169.jpg)