មណ្ឌលគិរីៈ លោក ប៊ូ សំអុល ហៅសាន ជាមេប៉ុស្តិ៍តំបន់ព្រំដែនដែលគ្រប់គ្រងច្រករបៀងចំនួន៣កំពុងសប្បាយប្រមូលលុយពីបទល្មើសដឹកជញ្ជូនឈើប្រណីតទៅលក់នៅស្រុកយួនយ៉ាងត្រជាក់ចិត្ត។ លោក ប៊ូ សំអុល ហៅសាន កំពុងអនុវត្តន៍តាមមេរៀនរបស់លោក សេង ប៉ូ មេប៉ុស្តិ៍ចាស់ដែលត្រូវ ដកហូតចេញពីតំណែង ដោយគ្មានខ្លាចក្រែងអ្វីទាំងអស់។ ប្រការនេះហើយដែលប្រជាពលរដ្ឋ អំពាវនាវឲ្យអភិបាលខេត្តមណ្ឌលគិរីលោក អេង ប៊ុនហៀង និងស្នងការនគរបាលខេត្តនេះចាត់វិធានការទប់ស្កាត់ជាបន្ទាន់កុំឲ្យលោក ប៊ូ សំអុល ហៅសាន ធ្វើអ្វីៗតាមអំពើចិត្តទៀត។ នេះគីជាសេចក្តីរាយការណ៍ពីប្រជាពលរដ្ឋនិងមន្ត្រីអាជ្ញាធរមូលដ្ឋានតាមតំបន់ព្រំដែនក្នុងស្រុកកែវសីមា ខេត្តមណ្ឌលគិរី បានឲ្យអង្គភាពសារព័ត៌ដឹងយ៉ាងដូចេ្នះ។
តាមការបញ្ជាក់ចេញពីប្រភពដដែល បានឲ្យដឹងថា លោក ប៊ូ សំអុល ហៅសាន ជាអ្នកគ្រប់គ្រងច្រករបៀងចំនួន៣គឺច្រកងុំាដី ច្រកបាវ៉េ និងច្រក០៣ ហៅច្រកបាទ្បាង ព្រមទាំងច្រករបៀងមួយទៀតហៅងុំាយូនិតនៅជាប់ក្បែរច្រកបាទ្បាខេជាច្រកសំខាន់ក្នុងការនាំឈើប្រណីតទៅស្រុកយួន។ តាមរយៈច្រករបៀងដូចរៀបរាប់ខាងលើនេះឈ្មួញអាចនាំឈើប្រណីតទៅលក់នៅស្រុកយួនតាមរថយន្តនិងម៉ូតូយ៉ាងគគ្រឹកគគ្រេងព្រោះលោក ប៊ូ សំអុល ហៅសាន មិនដែលយកចិត្តទុកដាក់បង្ក្រាបម្តងណាទ្បើយ។ ផ្ទុយទៅវិញឲ្យតែក្រុមឈ្មួញបង់លុយប្រចាំថ្ងៃឬប្រចាំខែឲ្យលោក ប៊ូ សំអុល ហៅសាន បានទៀងទាត់គឺពួកគេអាចធ្វើអ្វីៗតាមអំពើចិត្ត។
សកម្មភាពដឹកជញ្ជូនឈើប្រណីតនៅក្នុងខេត្តមណ្ឌលគិរីទៅស្រុកយួនខ្លាំងក្លាជាងគេ គឺនៅច្រកងុំាដី និងច្រកបាទ្បាង ធ្វើឲ្យលោក ប៊ូ សំអុល ហៅសាន ប្រមូលលុយដាក់ហោប៉ៅយ៉ាងកាក់កបបំផុត។ ប្រជាពលរដ្ឋសង្ស័យថាមួយផ្នែកដែលបានមកពីការបើកដៃឲ្យឈ្មួញដឹកជញ្ជូនឈើប្រណីតទៅលក់នៅស្រុកយួននោះលោក ប៊ូ សំអុល ហៅសាន បានបង់ទៅឲ្យមេកើយនៅខាងលើជាប្រចាំទើបថ្នាក់លើធ្វើមិនដឹងមិនឮអ្វីទាំងអស់។ ហេតុនេះហើយទើបលោក ប៊ូ សំអុល ហៅសាន ក្លាយជាអ្នកបើកដៃឲ្យឈ្មួញនាំឈើប្រណីតទៅស្រុកយួនតាមច្រករបៀងក្នុងស្រុកកែវសីមាដោយគ្មានខ្លាចក្រែងអ្វីទាំងអស់៕
