លោក វង្ស សុខសិរី បានចាត់ចែងមន្ត្រីជំនិតៗជាបក្ខពួករបស់ខ្លួនជាច្រើនក្រុម ឲ្យចុះទៅប្រមូលលុយពីក្រុមឈ្មួញដែលរកស៊ីដឹកជញ្ជូនឈើប្រណីតចេញពី តាមតំបន់អភិរក្ស តំបន់ព្រៃការពារនិងតំបន់ឧទ្យានជាតិ យ៉ាងអនាធិបតេយ្យបំផុត ហើយក្រុមមួយចំនួនទៀតក៏បានចុះទៅប្រមូលលុយពីតាមបណ្តារោងសិប្បកម្ម ដែលប្រមូលទិញឈើប្រណីតយកមកកែច្នៃ ឬស្តុកទុកសម្រាប់នាំចេញដោយខុសច្បាប់។ គ្មានឈ្មួញណាម្នាក់ដែលពាក់ព័ន្ធជាមួយការរកស៊ីដឹកជញ្ជូនឈើ ខុសច្បាប់អាចដំណើរការដោយរលូនល្អនោះទេ ប្រសិនបើមិនមានការបង់លុយជាប់ជាប្រចាំជូនជំនាញរដ្ឋបាលព្រៃឈើ របស់លោក វង្ស សុខសិរី ហើយបើតាមការលើកឡើងរបស់មន្ត្រីមួយចំនួនបានឲ្យដឹងថាលោក វង្ស សុខសិរី ក្នុងតួនាទីជានាយខណ្ឌរដ្ឋបាលព្រៃឈើ ខេត្តរតនគិរីមិនខុសពីយក្សស៊ីកំពឹសនោះទេ ចង់បញ្ជាក់ថា សូម្បីតែលុយកាក់សេនក៏លោក វង្ស សុខសិរី មិនឲ្យរបូតពីកណ្តាប់ដៃ ឬមិនបានបែងចែកឲ្យមន្ត្រីតូចតាចបានរស់ផងទេ។
ទឹកដីខេត្តរតនគិរី ពោរពេញទៅដោយបទល្មើសនៃការកាប់បំផ្លាញព្រៃឈើយ៉ាងវិនាសហិនហោច ក្នុងនោះមានការប៉ះពាល់ដល់ផ្ទៃដី ព្រៃសហគមន៍ តំបន់ព្រៃការពារ និងតំបន់ឧទ្យានជាតិវីរៈជ័យផងដែរ ហើយក្រុមឈ្មួញដែលរកស៊ីកាប់បំផ្លាញ និងដឹកជញ្ជូនឈើខុសច្បាប់ឆ្លងកាត់ទឹកដីខេត្តរតនគិរី ភាគច្រើនមានងារជាឧកញ៉ា មានទំនាក់ទំនងជិតដិតជាមួយលោក វង្ស សុខសិរី ទើបជំនួញឈើខុសច្បាប់របស់ពួកគេមិនដែលមានការរំខាន ហើយគេឆ្ងល់ថាក្នុងតួនាទីជានាយខណ្ឌរដ្ឋបាលព្រៃឈើ ខេត្តរតនគិរីបច្ចុប្បន្ននេះ លោក វង្ស សុខសិរី ធ្វើអ្វីខ្លះ ព្រោះគេមិនដែលឃើញលោក វង្ស សុខសិរី ដឹកនាំកម្លាំងចុះស្រាវជ្រាវស៊ើបអង្កេតដើម្បីបង្ក្រាបសកម្មភាព ដឹកជញ្ជូនឈើខុសច្បាប់យកស្នាដៃបង្អួតថ្នាក់លើម្តងណាឡើយ។
លោក វង្ស សុខសិរី ដែលល្បីឈ្មោះក្នុងការប្រមូលលុយពីជំនួញឈើខុសច្បាប់មិនដែលក្រែង ញញើតវិធានការរឹតបន្តឹងរបស់អង្គភាពប្រឆាំងអំពើពុករលួយម្តងណាឡើយ អំឡុងពេលដែលលោក វង្ស សុខសិរី ធ្វើជានាយសង្កាត់រដ្ឋបាលព្រៃឈើ ក្រុងស្ទឹងត្រែង រហូតលោក វង្ស សុខសិរី មានលុយច្រើនហូរហៀររត់ការឡើងធ្វើជានាយខណ្ឌរដ្ឋបាលព្រៃឈើ ខេត្តរតនគិរីដែលជាអំណាចត្រូវប៉ាន់មានឱកាសប្រមូលផលប្រយោជន៍យកទៅច្រក ហោប៉ៅធ្វើមានធ្វើបានផ្ទាល់ខ្លួនយ៉ាងរំភើយ។
បញ្ហានេះហើយទើបលោក វង្ស សុខសិរី បន្តរក្សាភាពស្ងៀមស្ងាត់មិនដែលអើពើចាត់វិធានការបង្ក្រាបទប់ស្កាត់ ការកាប់បំផ្លាញព្រៃឈើនៅតាមតំបន់ព្រៃសហគមន៍និងតំបន់ព្រៃការពារ ព្រោះលោក វង្ស សុខសិរី មិនចង់មានការប៉ះទង្គិចជាមួយក្រុមឈ្មួញធំៗដែលជ្រកក្រោមស្បែកជា ឧកញ៉ា ឬជ្រកក្រោមស្លាកប្រមូលទិញឈើដែលបានមកពីការបង្ក្រាបរបស់សមត្ថ កិច្ចនោះទេទើបឃុបឃិតបិទភ្នែកឲ្យក្រុមឈ្មួញធ្វើអ្វីៗតាមតែអំពើ ចិត្ត រហូតដល់ពេលនេះ ទឹកដីខេត្តរតនគិរី បានជាប់ចំណាត់ថ្នាក់នាំមុខគេចំពោះភាពកម្រើកឡើងវិញនៃការដឹកជញ្ជូន ឈើខុសច្បាប់គ្មាននរណាអើពើបង្ក្រាប។ គេចង់ឃើញប្រធានរដ្ឋបាលព្រៃឈើលោក ឆេង គឹមស៊ុន យកចិត្តទុកដាក់ ពិនិត្យមើលភាពអសកម្មនិងអនាធិបតេយ្យ នៃការកាប់បំផ្លាញព្រៃឈើនៅក្នុងខេត្តរតនគិរី ដែលកំពុងបង្កភាពក្តៅក្រហាយដល់ជនជាតិភាគតិចឡើងវិញផង មិនគួរទុកឲ្យលោក វង្ស សុខសិរី ជិះសេះលែងដៃធ្វើអ្វីៗតាមតែអំពើចិត្តនោះទេ ព្រោះពេលបច្ចុប្បន្ននេះ ខេត្តរតនគិរី កំពុងនាំមុខគេចំពោះភាពគគ្រឹកគគ្រេងនៃការដឹកជញ្ចូនឈើខុសច្បាប់ គ្មាននរណាអើពើបង្ការបង្ក្រាបឲ្យមានប្រសិទ្ធភាពទៅតាមបទបញ្ជា របស់លោក ហ៊ុន សែន នោះទេ ៕
