លោក ហេង ឡុងអូន និងលោក ឌិន វ៉ាន់ឌី ដែលជាមេឈ្មួញរកស៊ីនាំចូលទំនិញគេចពន្ធនិងទំនិញខុសច្បាប់ តាមផ្លូវសមុទ្រចូលមកលក់ចែកចាយពាសពេញខេត្តព្រះសីហនុ និងបន្តនាំចេញមកលក់ចែកចាយដល់រាជធានីភ្នំពេញ និងបណ្តាខេត្តមួយចំនួនទៀត គ្មាននរណាហ៊ានប៉ះពាល់។
សេចក្តីរាយការណ៍ព័ត៌មានពីខេត្តព្រះសីហនុ បានឲ្យដឹងថាបច្ចុប្បន្ននេះមានរថយន្តទាំងតូចទាំងធំ បានធ្វើសកម្មភាពដឹកជញ្ជូនទំនិញគេចពន្ធនិងទំនិញខុសច្បាប់ចេញពីផ្ទះរបស់លោក ឌិន វ៉ានឌី ជាមន្ត្រីយោធាជើងទឹកដ៏មានឥទ្ធិពលនៅចំណុចទំនប់រលក មកលក់ចែកចាយបោះដុំតាមឃ្លាំង តាមហាងលក់ទំនិញ ដែលជាទីតាំងស្តុកដ៏សំខាន់របស់ឈ្មួញកណ្តាល សម្រាប់លក់ចែកចាយបន្តនៅទូទាំងខេត្តព្រះសីហនុ និងមកដល់ខេត្តកំពត ហើយនិងមកដល់ខេត្តកំពង់ស្ពឺ និងហួសមកដល់រាជធានីភ្នំពេញ។ ទំនិញគេចពន្ធជាច្រើនដែលត្រូវបាននាំចូលយកមកស្តុកទុកនៅចំណុចផ្ទះលោក ឌិន វ៉ាន់ឌី គឺមានប្រភេទគ្រឿងភេសជ្ជៈ គ្រឿងទេសនិងទំនិញដ៏មានតម្លៃជាច្រើនប្រភេទទៀត ដែលត្រូវបានដឹកជញ្ជូនដោយផ្ទាល់ពីស្រុកសៀម មកឡើងនៅចំណុចផែផ្ទាល់ខ្លួននៅខាងក្រោយផ្ទះរបស់លោកឌិន វ៉ាន់ឌី គេមិនដែលឃើញសមត្ថកិច្ចនិងមន្ត្រីជំនាញពាក់ព័ន្ធចុះទៅត្រួតពិនិត្យម្តងណាឡើយ។
ទំនិញគេចពន្ធរបស់លោក ឌិន វ៉ាន់ឌី ត្រូវបានម៉ៅការ ឲ្យមេឈ្មួញដ៏ធំម្នាក់ទៀតគឺលោក ហេង ឡុងអូន ជាអ្នកម៉ៅការដឹកជញ្ជូន ចូលតាមផែផ្ទាល់ខ្លួនរបស់ពួកគេ ដោយគ្មានការត្រួតពិនិត្យអ្វីឡើយ។ មានការបង្ហើបឲ្យដឹងផងដែរថា ទូកដឹកទំនិញធំៗបានចូលចតនៅកណ្តាលសមុទ្រ ប៉ុន្តែទូកតូចៗត្រូវបានលោក ហេង ឡុងអូន និងលោក ឌិន វ៉ាន់ឌី យកទៅសាងទំនិញឡើងតាមផែផ្ទាល់ខ្លួនដែលស្ថិតនៅក្រោយផ្ទះរបស់គាត់ទាំងយប់ទាំងថ្ងៃគេ មិនដែលឃើញសមត្ថកិច្ចណាមួយយកចិត្តទុកដាក់ពីបញ្ហានេះទាល់តែសោះ ហើយទំនិញជាច្រើនត្រូវបានដឹកជញ្ជូនតាមរថយន្តចេញពីផ្ទះរបស់លោក ឌិន វ៉ាន់ឌី ទៅលក់ចែកចាយយ៉ាងអនាធិបតេយ្យ ។
នៅទូទាំងក្រុងព្រះសីហនុ នរណាក៏ស្គាល់ឥទ្ធិពលអំណាចរបស់លោក ឌិន វ៉ាន់ឌី និងលោក ហេង ឡុងអូន ដែរគឺគ្មាននរណាហ៊ានប៉ះពាល់ទេ ព្រោះពួកគេមានលុយមានអំណាច ដោយសារអាជីព រកស៊ីដឹកជញ្ជូនទំនិញគេចពន្ធតាមផ្លូវសមុទ្រ និងមានផែផ្ទាល់ខ្លួននៅក្រោយផ្ទះ មិនដែលខ្វល់ខ្វាយពីការរឹតបន្តឹងរបស់អង្គភាពប្រឆាំងអំពើពុករលួយនិងការព្រមានរបស់សម្តេចនាយករដ្ឋមន្រ្តី ហ៊ុន សែន នោះទេ។ ដូចជាលោក ឌិន វ៉ាន់ឌី ជាដើមនៅតែអាចប្រើប្រាស់ស្បែកជាយោធា ក្នុងការរកស៊ីដឹកជញ្ជូនទំនិញគេចពន្ធយ៉ាងគគ្រឹកគគ្រេងដោយគ្មាននរណាហ៊ានប៉ះពាល់ ហើយសមត្ថកិច្ចនិងមន្ត្រីជំនាញជាច្រើន បានត្រឹមតែរាប់ក្បាលឡានឬក្បាលទូករបស់លោកឌិន វ៉ាន់ឌី និងលោក ហេង ឡុងអូន ឲ្យបង់លុយតែប៉ុណ្ណោះ ហើយទុកឱ្យអ្វីៗប្រព្រឹត្ត តាមអំពើចិត្តរបស់ឈ្មួញរកស៊ីខុសច្បាប់និងធ្វើឲ្យបាត់បង់ចំណូលថវិកាជាតិយ៉ាងច្រើន ប្រជាពលរដ្ឋសង្ស័យថាលោកអភិបាលក្រុងព្រះសីហនុប្រហែលត្រូវមេឈ្មួញទិញទឹកចិត្តបានហើយតាមមើលទៅទើបមិនហ៊ានបង្រ្កាប ទំនិញគេចពន្ធមេឈ្មួញទាំងពីរនាក់នេះ។
