ខេត្តឧត្តរមានជ័យដែលមានលោក សរ ថាវី ជាអភិបាលខេត្តតែងតែកើតមានបញ្ហាមិនចេះចប់ដូចជាករណីពលរដ្ឋខ្មែរឆ្លងដែនចូលទៅកាប់ឈើគ្រញូងលើទឹកដីសៀម ហើយត្រូវទាហានសៀមបាញ់សម្លាប់និងករណីក្រុមហ៊ុនដីសម្បទានសេដ្ឋកិច្ចបំផ្លាញព្រៃឈើយ៉ាងមហន្តរាយជាដើម។ ជាក់ស្តែងសេចក្តីរាយការណ៍ពីប្រជាពលរដ្ឋនៅស្រុកត្រពាំងប្រាសាទបានឲ្យដឹងថា ក្រុមហ៊ុនធំមួយដែលទទួលបានដីសម្បទានសេដ្ឋកិច្ចសម្រាប់ដាំកៅស៊ូនៅក្នុងស្រុកនេះបានយកអាជ្ញាប័ណ្ណពីក្រុមហ៊ុនផ្សេងដើម្បីកាប់បំផ្លាញព្រៃឈើនិងដឹកជញ្ជូនឈើធ្វើអាជីវកម្មខុសច្បាប់យ៉ាងពេញបន្ទុក។ បញ្ហានេះលោក សរ ថាវី ដែលជាអភិបាលខេត្តនិងមេរដ្ឋបាលព្រៃឈើប្រចាំខេត្តនេះដឹងយ៉ាងច្បាស់ប៉ុន្តែមិនចាត់វិធានការទប់ស្កាត់ទ្បើយ។
ប្រភពពីប្រជាពលរដ្ឋនៅស្រុកត្រពាំងប្រាសាទបានឲ្យដឹងថាក្រុមហ៊ុនដែលកំពុងធ្វើសកម្មភាពកាប់ឈើនោះឈ្មោះក្រុមហ៊ុនសុខ សំណាង ហើយក្រុមហ៊ុនដែលលក់អាជ្ញាប័ណ្ណឲ្យក្រុមហ៊ុននេះគឺក្រុមហ៊ុនដាតារ៉ាប់ប័រនៅស្រុកអន្លង់វែង និងក្រុមហ៊ុនទំរីងរ៉ាប់ប័រ។ ក្រុមហ៊ុនសុខ សំណាង កំពុងកាប់ឈើនៅស្រុកត្រពាំងប្រាសាទហើយដឹកជញ្ជូនយកទៅចែកចាយនៅខេត្តសៀមរាបនិងខេត្តផ្សេងៗយ៉ាងពេញបន្ទុកក្រោមអាជ្ញាប័ណ្ណរបស់ក្រុមហ៊ុនដាតារ៉ាប់ប័រនិងក្រុមហ៊ុនទំរីងរ៉ាប់ប័រ។
ប្រភពបានឲ្យដឹងទៀតថាអ្នករត់ការដឹកឈើរបស់ក្រុមហ៊ុនសុខ សំណាង មានឈ្មោះ ស៊ីម និងឈ្មោះរ៉េត ហើយពួកគេដឹកជញ្ជូនឈើតាមរថយន្តធំៗផ្ទុកឈើចាប់ពី១៥ម៉ែត្រគូបទ្បើយទៅ។ បើតាមដឹងក្រុមហ៊ុនសុខ សំណាង មិនត្រឹមតែបំផ្លាញព្រៃឈើនៅស្រុកត្រពាំងប្រាសាទខេត្តឧត្តរមានជ័យទេ គឺបំភ្លាញព្រៃឈើនៅខេត្តព្រះវិហារ ខេត្តកំពង់ធំ និងបណ្តាខេត្តផ្សេងៗផងដែរ។
តាមច្បាប់ ការអនុញ្ញាតឲ្យដឹងឈើតាមរថយន្តធំៗគឺមិនឲ្យលើសពី១៨ម៉ែត្រគូបនោះទេ ដើម្បីកុំឲ្យខូចផ្លូវថ្នល់ដោយសារតែរថយន្តផ្ទុកលើសទម្ងន់ ប៉ុន្តែក្រុមហ៊ុនសុខ សំណាង ផ្ទុកឈើចាប់៥០ម៉ែត្រគូបទ្បើងទៅដែលធ្វើឲ្យផ្លូវជាតិលេខ៦៧ពីស្រុកអន្លង់វែងខេត្តឧត្តរមានជ័យឆ្ពោះទៅខេត្តសៀមរាបរងការខូចខាតជាបន្តបន្ទាប់។
មិនតែប៉ុណ្ណោះប្រជាពលរដ្ឋបានបង្ហើបឲ្យដឹងថាក្រុមហ៊ុនសុខ សំណាង គឺជាអ្នកជួលប្រជាពលរដ្ឋឆ្លងដែនខុសច្បាប់ចូលទៅកាប់ឈើគ្រញូងលើទឹកដីសៀមយកមកលក់ឲ្យខ្លួនក្នុងតម្លៃថោកទៀតផង ដែលជាមូលហេតុធ្វើឲ្យទាហានសៀមបាញ់សម្លាប់ប្រជាពលរដ្ឋខ្មែរជាបន្តបន្ទាប់។ ហេតុនេះក្រសួងនិងស្ថាប័នពាក់ព័ន្ធត្រូវចាត់វិធានការលើម្ចាស់ក្រុមហ៊ុនសុខ សំណាង តាមផ្លូវច្បាប់ជាបន្ទាន់ព្រោះម្ចាស់ក្រុមហ៊ុននេះកំពុងជាន់ឈ្លីបទបញ្ជាលេខ០០២របស់សម្ដេចនាយករដ្ឋមន្រ្តី ហ៊ុន សែន យ៉ាងគឃ្លើន៕
