បន្ទាយមានជ័យ ៖ តាមប្រភពបានរាយការណ៏ពីក្រុងប៉ោយប៉ែត ឱ្យដឹងថានៅផ្នែកខាងជើងផ្លូវជាតិលេខ ៥ ប្រមាណ ៥០០ ម៉ែត្រ ពីអតីតការិយាល័យទំនាក់ទំនងព្រំដែនកម្ពុជា-ថៃ រហូតទៅ ដល់ប៉ុស្តិ៍បឹងសាគូរ ស្ថិតនៅក្នុងភូមិក្បាលស្ពាន ១ សង្កាត់ ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យមានច្រក របៀងប្រមាណ ៩ កន្លែងដែលគ្រប់គ្រងរួមទៅដោយលោក សូរ ចាន់ណារី ជា មេបញ្ជាការ ប៉ូលិសវរៈការពារព្រំដែនលេខ ៩១១ ដែលមានអ្នកប្រចាំការនៅប៉ុស្តិ៍ បឹងសាគូរកំពុងតែបើកដៃឱ្យ ឈ្មួញនាំទំនិញចូលតាមច្រក របៀងរបស់លោកគ្រប់គ្រង ទាំងយប់ទាំងថ្ងៃ ។
ហើយរាល់ការនាំចូលផលិតផលនានាពីប្រទេសថៃចូលមកកម្ពុជា មិនបានបង់ពន្ធជូនរដ្ឋដែលគេហៅថា ទំនិញគេច ពន្ធនោះ បានធ្វើចរាចររៀងរាល់ថ្ងៃដោយមានការឃុបឃិតរវាងសមត្ថកិច្ចជំនាញដែលឈរជើងនៅតាមបណ្តាប៉ុស្តិ៍ច្រករបៀងនានាជាមួយឈ្មួញធ្វើឱ្យរាជ រដ្ឋាភិបាលបានបាត់ចំណូលយ៉ាងច្រើនក្នុងមួយឆ្នាំៗរាប់រយលានដុល្លារអាមេរិកដោយសារតែមន្ត្រីរបស់រាជរដ្ឋាភិបាលបានយកប្រាក់ទាំងអស់នោះដាក់ចូលហោប៉ៅបុគ្គលផ្ទាល់ខ្លួនធ្វើមានធ្វើបានសំរាប់បក្សគ្រួសារនិយម ។
ប្រភពដដែលបានបន្តឱ្យដឹងទៀតថាដោយសារអំណាច លោក សូរ ចាន់ណារី ជាមេបញ្ជាការវរៈការពារព្រំដែន លេខ ៩១១ នេះនៅពីក្រោយបើកដៃដោយចំហរ ឱ្យឈ្មួញនាំចូលទំនិញគេចពន្ធ សព្វសារពើចូលមកកម្ពុជាដោយបង់ពន្ធចូលរដ្ឋប្រមាណតែ៥ភាគរយប់ុណ្ណោៈ តែចំពោះសមត្ថកិច្ចជំនាញនានាដែលនៅប្រចាំការតាមប៉ុស្តិ៍ទាំង៩កន្លែងនោះបង្កើតអំពើស៊ីសំណូកសូកប៉ាន់ពុករលួយ សម្រាប់ប្រមូលប្រាក់ចូលហោប៉ៅបុគ្គលនិងបក្ខពួកនិងក្រុមគ្រួសារតែប៉ុណ្ណោះរីឯថវិកាជាតិវិញបានត្រូវខាតបង់ជារៀងរាល់ថ្ងៃផងដែរ ។
ប្រភពដដែលបានបន្តឱ្យដឹងទៀតថា លោក សូរ ចាន់ ណារី ជាមេបញ្ជាការបានបញ្ជាឱ្យកូនចៅធ្វើសកម្មភាពប្រមូលលុយពីការនាំទំនិញគេចពន្ធពីប្រទេសថៃចូលមកកម្ពុជាដោយពុំមានការត្រួតពិនិត្យនោះទេគ្រាន់តែរាប់ក្បាលឡានយកប្រាក់តែប៉ុណ្ណោះ ។ ការនាំចូលទំនិញ គេចពន្ធតាមច្រករបៀងទាំង៩កន្លែងក្រោមការគ្រប់គ្រងរបស់កូនចៅលោក សូរ ចាន់ណារី នេះគឺពុំអាចរំលងសមត្ថកិច្ចដែលប្រចាំការនៅទីនោះបានឡើយ ។
ប្រភពដដែលបានបន្តឱ្យដឹងទៀតថា ដោយឡែកច្រករបៀងទាំង៩នេះមិនមែនមានតែការនាំចូលទំនិញគេចពន្ធនោះទេប្រជាពលរដ្ឋខ្មែរដែលឆ្លងដែនខុសច្បាប់ចូលទៅរកការងារធ្វើនៅប្រទេសថៃនោះត្រូវបង់ចាប់ពី ២០០ទៅ ៣០០ បាតហើយការទារយកប្រាក់ពីប្រជាពលរដ្ឋខ្មែរក៏ស្ថិតនៅក្រោមបទបញ្ជាលោក សូ ចាន់ណារី ជាមេបញ្ជាការប៉ូលិសវរៈការពារព្រំដែន លេខ ៩១១ នេះដែរទើបអាចអនុវត្តន៍ទៅបានដូច្នេះចំណូលពីការបណ្តែតបណ្តោយឱ្យទំនិញគេចពន្ធនិងចំណូលពីការជម្រិតយកប្រាក់ពីប្រជាពលរដ្ឋចំណាកស្រុកនោះក្នុងមួយថ្ងៃ លោក សូរ ចាន់ណារី ជាអ្នកចេញមុខប្រមូលជំនួសរាជរដ្ឋាភិបាលដើម្បីយកទៅដាក់ក្នុងហោប៉ៅផ្ទាល់ខ្លួនតែប៉ុណ្ណោះ ។
គួររំលឹកផងដែរថាលោក សូរ ចាន់ណារី ធ្លាប់ត្រូវបានលោកព្រះរាជអាជ្ញាអមសាលាដំបូងខេត្តបន្ទាយមានជ័យធ្វើការព្រមានម្តងរួចមកហើយពីសកម្មភាពបណ្តែតបណ្តោយឱ្យមានទំនិញគេចពន្ធចូលមកកម្ពុជា និងសកម្មភាពប្រមូលប្រាក់ពីប្រជាពលរដ្ឋចំណាកស្រុកជាអំពើពុករលួយជាប្រព័ន្ធមួយបានកើតឡើងនៅតាមច្រករបៀងនានា និងច្រកទ្វារអន្តរជាតិស្របច្បាប់ផងដែរ ៕
