បច្ចុប្បន្ននេះគេសង្កេតឃើញ មានក្រុមពលករជាច្រើន បានសម្រុកចេញចូល លួចឆ្លងដែនខុសច្បាប់ តាមច្រករបៀងមួយកន្លែង គឺប៉ុស្តិ៍ប៉ោយប៉ែត គ្រប់គ្រងដោយលោក ណុល ម៉ាប់ ហៅខ្លាធំ ដែលជាមេប៉ុស្តិ៍ចំណុះឲ្យវរសេនាតូច ការពារព្រំដែនគោក លេខ៨៩១ កំពុងតែឃុបឃិត ជាមួយក្រុមមេខ្យល់ នាំពលករប្រុសស្រី ឆ្លងកាត់ព្រំដែន ហើយក៏មានការឃុបឃិតឲ្យ ហូរចូលទំនិញគេចពន្ធ យ៉ាងគគ្រឹកគគ្រេង មិនដែលក្រែងញញើត សេចក្តីណែនាំរបស់លោក ឧត្តមសេនីយ៍ត្រី អាត់ ខែម ជាស្នងការនគរបាល ខេត្តបន្ទាយមានជ័យ សូម្បីតែបន្តិច។
តាមសេចក្តីរាយការណ៏បានបង្ហើបឲ្យដឹងថា រៀងរាល់ថ្ងៃគេបានឃើញ សកម្មភាពជាក់ស្តែង របស់ប៉ុស្តិ៍ខាងនេះ កំពុងតែឃុបឃិត ជាមួយក្រុមមេខ្យល់ នាំពលករប្រុសស្រីជាច្រើន ដោយមិនជញ្ជូនតាមម៉ូតូ ឬរថយន្តនោះឡើយ ខ្លាចគេមើលឃើញទ្រង់ទ្រាយធំ។ គឺគេប្រើវិធីបន្លំភ្នែក ឲ្យពលករដើរដូចសត្វកណ្តៀរ ជញ្ជូនគ្រាប់ស្រូវ ដូចជាតាមផ្លូវតូចចង្អៀត ផ្លូវភក់ ផ្លូវតាមចន្លោះផ្ទះ របស់ប្រជាពលរដ្ឋ និងតាមផ្សារជាដើម។ បើគេបណ្តើរពលករ មកដល់ចំណុចរថយន្ត ត្រៀមទុកចាំដឹកយកទៅទម្លាក់ចុះ តាមកន្លែងលក់សំបុត្រ រថយន្តតាក់ស៊ី រថយន្តក្រុង នៅតំបន់ជាយដែន ក្រុងប៉ោយប៉ែត សុទ្ធតែមានការត្រូវរ៉ូវ ជាមួយក្រុមមេខ្យល់ ។
ប្រភពបានបញ្ជាក់ថា រាល់ការបណ្តើរពលករ មកឆ្លងចូលមាតុភូមិវិញ គឺមានពលករមិនលើសពី ២០នាក់នោះទេ ក្នុងមួយក្រុមៗ និងដើរដាច់ៗពីគ្នា ប្រមាណ ៥ម៉ែត្រ និងពុំមានកាន់របស់របទេ គឺដើរធម្មតា ចំណែករថយន្តចាំទទួល គឺមានរថយន្តកាមរី ស៊េរីឆ្នាំ១៩៩៣ -១៩៩៥ និងមានរថយន្តលុច្សស៊ិស្សស៊េរីថ្មី អត់ស្លាកលេខ ក៏មានដែរ ត្រង់ចំណុចមុខផ្សាររ៉ាថ្មី ផ្សារមង្គលថ្មី និងក្រោយដើមពោធិ៍ លាងរថយន្ត។ល។ ពលករម្នាក់ ដែលមិនបានបញ្ចេញឈ្មោះ បានប្រាប់ថា ការនាំចេញពីប្រទេសថៃ គឺគាត់ត្រូវបង់លុយ ឲ្យទៅក្រុមមេខ្យល់ ក្នុងម្នាក់ ២៥០០បាត ស្មើរនិងជាង ៧០ដុល្លារ ឬ ៣២ម៉ឺនរៀល ទើបគេនាំចេញ ។
ពលករបានបន្តថា ក្រុមមេខ្យល់បានប្រាប់ថា បច្ចុប្បន្នត្រូវឡើងថ្លៃបន្តិចហើយ ព្រោះអីឡូវនេះគេបិទផ្លូវកាត់ ឬច្រករបៀង ជាច្រើនកន្លែង មិនងាយនិងត្រូវរ៉ូវ ជាមួយសមត្ថកិច្ចនគរបាលការពារព្រំដែន ដូច្នេះគាត់ក៏សម្រេចចិត្ត ចេញតាមច្រករបៀង ខាងលើនេះតែម្តង។ ពាក់ព័ន្ធបញ្ហានេះ ប្រជាពលរដ្ឋរស់នៅម្តុំ ច្រកខាងលើ បានសំណូមពរឲ្យ លោកឧត្តមសេនីយ៍ត្រី អាត់ ខែម ស្នងការខេត្តបន្ទាយមានជ័យ សូមត្រួតពិនិត្យរាល់បទល្មើស របស់លោក ណុល ម៉ាប់ ហៅខ្លាធំ ជាមេប៉ុស្តិ៍ប៉ោយប៉ែត ដែលកំពុងតែបើកច្រករបៀង ឃុបឃិតជាមួយក្រុមមេខ្យល់ឲ្យមានការលួច ឆ្លងដែនខុសច្បាប់។
ពាក់ពន្ធ័បញ្ហាខាងលើនេះ លោក ណុល ម៉ាប់ ធ្លាប់បានប្រាប់អ្នកកាសែតថា កំលាំងទាំងនេះ គឺបានដេកនៅផ្ទះឈ្មោះ លី នៅជិតមាត់អូរព្រំដែន ដើម្បីរងចាំទទួលយក ប័ណ្ណឆ្លងដែន មានតែចំនួន ១៦នាក់ ទេ ហើយច្រករបស់គាត់ ភាគីថៃមិនអនុញ្ញាតិឲ្យ ចេញពលករនោះទេ ប្រសិនអាចចេញបាន នឹងមានគ្រោះថ្នាក់ ដោយប្រការណាមួយ ជាមិនខាន។ លោកបានបន្តថា ចំណែកឯកន្លែង ផ្សារមង្គលថ្មី គឺមិនមានពលករទេ បើមានគាត់ហ៊ាន ទទួលខុសត្រូវ ហើយពលករខ្លះ បានទៅស្នាក់នៅ ផ្ទះប្រជាពលរដ្ឋ និងត្រូវជាបងប្អូន របស់ពួកគាត់ ដើម្បីរងចាំទទួលយក ប័ណ្ណឆ្លងដែន គឺមានសកម្មភាពជាហូរហែ៕
