មណ្ឌលគិរីៈ មន្ត្រីប៉េអឹមមួយចំនួននៅស្រុកកែវសីមាបានឲ្យដឹងថា អ្នកដែលមានជំនាញជំរិតយកលុយពីក្រុមអ្នកកាប់ឈើនោះគឺជាកូនចៅរបស់លោក សាក់ សារ៉ុន មេប៉េអឹមស្រុកកែវសីមា ហើយត្រូវជាប្អូនបង្កើតរបស់លោក សាក់ សារ៉ាង មេប៉េអឹមខេត្តមណ្ឌលគិរី។
មន្ត្រីប៉េអឹមរូបនោះបានបញ្ជាឲ្យកូនចៅរបស់ខ្លួនបង្កើតកុងត្រូលជជុះពង្រាយតាមផ្លូវនៃព្រំប្រទល់ខេត្តមណ្ឌលគិរី និងខេត្តក្រចេះនៅចំណុច១០៥។ ប្រសិនបើនរណាម្នាក់ហ៊ានតវ៉ាមិនព្រមបង់លុយតាមការកំណត់គេប្រាកដជាយកឈ្មោះលោក សាក់ សារ៉ុន មេបញ្ជាការប៉េអឹមស្រុកកែវសីមានិងយកឈ្មោះលោក សាក់ សារ៉ាង មេបញ្ជាការប៉េអឹមខេត្តមណ្ឌលគិរីមកគំរាមតែម្តង។
តាមសេចក្តីរាយការណ៍ពីប្រជាពលរដ្ឋរស់នៅតំបន់ជាប់ព្រំដែនខេត្តមណ្ឌលគិរីនិងខេត្តក្រចេះបានឲ្យដឹងថា កាលពីថ្ងៃទី២៩ ខែកក្កដា ឆ្នាំ២០១៤នៅចំណុច១០៥ ដែលជាព្រំប្រទល់រវាងខេត្តទាំងពីរមានរទេះគោដឹកឈើចេញពីព្រៃប្រមាណ១០០រទេះ។ កម្មករស៊ីឈ្មួញដឹកឈើមួយចំនួនបានឲ្យដឹងថា ដើម្បីដឹកឈើចេញពីព្រៃបានគឺត្រូវបង់លុយឲ្យសមត្ថកិច្ចពាក់ព័ន្ធដូចជាមន្ត្រីនគរបាល មន្ត្រីប៉េអឹម និងមន្ត្រីយោធាក្នុងមួយរទេះ៧០ដុល្លារ ហើយប្រសិនបើនរណាមិនជូនដំណឹងមុនទេត្រូវពិន័យដល់១៥០ដុល្លារ។ ក្នុងនោះមន្ត្រីប៉េអឹមម្នាក់ត្រូវបានគេដឹងថា ជាជើងខ្លាំងក្នុងការបង្ខំឲ្យអ្នកចូលព្រៃកាប់ឈើបង់លុយតាមការកំណត់របស់ខ្លួន។
ប្រជាពលរដ្ឋក្នុងខេត្តក្រចេះនិងខេត្តមណ្ឌលគិរីសង្ស័យថា មេប៉េអឹមស្រុកកែវសីមា និងមេប៉េអឹមខេត្តមណ្ឌលគិរីដែលមានឈ្មោះដូចខាងលើនេះគឺជាអ្នកនៅពីក្រោយបទល្មើសរកស៊ីឈើខុសច្បាប់របស់ឈ្មួញខិលខូចនៅចំណុចភូមិ១០៥ជាប់ព្រំប្រទល់ខេត្តមណ្ឌលគិរីនិងខេត្តក្រចេះតែម្តង។ សូមលោកមេបញ្ជាការកងរាជអាវុធហត្ថលើផ្ទៃប្រទេសពិនិត្យមើលបញ្ហានេះផង ព្រោះមេប៉េអឹមស្រុកកែវសីមាឈ្មោះ សាក់ សារ៉ុន និងមេប៉េអឹមខេត្តមណ្ឌលគិរីឈ្មោះ សាក់ សារ៉ាង កំពុងធ្វើអ្វីៗតាមអំពើចិត្ត ៕
