មេឈ្មួញឈេីឈ្មោះ ចែផេង បានធ្វើសកម្មភាពដឹកជញ្ជូនឈើចេញពីស្រុកឈូក ទៅចែកចាយតាមដេប៉ូក្នុងស្រុកផ្សេងៗនៃខេត្តកំពត យ៉ាងពេញបន្ទុកហើយគ្មានមន្ត្រីរដ្ឋបាលព្រៃឈើឬសមត្ថកិច្ចពាក់ព័ន្ធណាចាត់វិធានការទប់ស្កាត់ទេ។

ប្រជាពលរដ្ឋក្នុងស្រុកឈូក បានលើកឡើងថា បច្ចុប្បន្នឈ្មួញឈ្មោះ ចែផេង ដើរប្រមូលទិញឈើពីឈ្មួញតូចតាចនៅក្នុងស្រុកជុំគិរី និងស្រុកឈូក ដឹកយកមកស្តុកទុកក្នុងផ្ទះរបស់ខ្លួន ពេលប្រមូលទិញបានច្រើនទើបដឹកជញ្ជូនទៅចែកចាយតាមដេប៉ូក្នុងស្រុកនានា។ ប្រភពបានឲ្យដឹងថា មន្ត្រីរដ្ឋបាលព្រៃឈើនិងសមត្ថកិច្ចនគរបាល សមត្ថកិច្ចអាវុធហត្ថក្នុងស្រុកឈូក មិនដែលប៉ះពាល់ឈ្មួញឈ្មោះ ចែផេង ទាល់តែសោះព្រោះខ្លាចបាត់បង់ប្រភពចំណូលរបស់ពួកគេ។ ដូច្នេះហើយទើបឈ្មួញឈ្មោះ ចែផេង ប្រមូលទិញឈើមកស្តុកទុកក្នុងផ្ទះរបស់ខ្លួននៅភូមិស្ទឹង ឃុំក្រាំងស្នាយ ស្រុកឈូក ខេត្តកំពត ហើយបន្តដឹកចេញទៅចែកចាយតាមដេប៉ូក្នុងបណ្ដាស្រុកនានា ព្រោះគ្មានមន្ត្រីជំនាញឬសមត្ថកិច្ចណាហ៊ានប៉ះពាល់ទាល់តែសោះ។

ប្រភពពីមន្ត្រីរាជការនៅក្នុងមន្ទីរកសិកម្មខេត្តកំពត បានឲ្យដឹងថា សកម្មភាពរបស់ឈ្មួញឈ្មោះ ចែផេង ត្រូវបានប្រធានមន្ទីរកសិកម្មខេត្តកំពត និងមេរដ្ឋបាលព្រៃឈើខេត្តកំពត ដឹងយ៉ាងច្បាស់ប៉ុន្តែដោយសារពួកគេជាប់ពាក់ព័ន្ធផលប្រយោជន៍ទើបមិនចាត់វិធានការបង្ក្រាប។ ក្នុងនោះមន្ត្រីរដ្ឋបាលព្រៃឈើក្នុងស្រុកឈូក និងស្រុកជុំគិរី គឺជាអ្នកប្រមូលផលប្រយោជន៍យកទៅចែកចាយឲ្យមេៗនៅខាងលើជាប្រចាំ ហេតុនេះហើយទើបឈ្មួញឈ្មោះ ចែផេង អាចធ្វើសកម្មភាពប្រមូលទិញឈើក្នុងស្រុកឈូក និងស្រុកជុំគិរី ដោយគ្មានញញើតអ្វីទាំងអស់។ ប្រការនេះកំពុងធ្វើឲ្យព្រៃឈើដែលនៅសល់បន្តិចបន្តួចក្នុងស្រុកឈូក និងស្រុកជុំគិរី កំពុងប្រឈមនឹងសេចក្ដីវិនាសព្រោះឈ្មួញតូចតាចកាប់ឈើទុកលក់ឲ្យឈ្មួញឈ្មោះ ចែផេង ហើយឈ្មួញម្នាក់នេះបន្តសកម្មភាពដឹកជញ្ជូនឈើទៅចែកចាយតាមដេប៉ូជាច្រើនកន្លែងក្នុងទឹកដីខេត្តកំពត យ៉ាងរលូន។ ដូច្នេះលោក វេង សាខុន រដ្ឋមន្ត្រីក្រសួងកសិកម្ម និងលោក កែវ អូម៉ាលីស្ស ប្រធានរដ្ឋបាលព្រៃឈើនៃក្រសួងកសិកម្ម គួរពិនិត្យមើលខ្លះផងព្រោះឈ្មួញឈ្មោះ ចែផេង នៅតែបន្តសកម្មភាពដឹកជញ្ជូនឈើចេញពីស្រុកជុំគិរី និងស្រុកឈូក ខេត្តកំពត យ៉ាងពេញបន្ទុកគ្មានញញើតអ្វីឡើយ៕