ខេត្តកំពត៖ តាមសេចក្ដីរាយការណ៍ពីប្រជាពលរដ្ឋរស់នៅតំបន់ច្រកព្រំដែនព្រែកចាក ស្រុកកំពង់ត្រាច ខេត្តកំពត បានឲ្យដឹងថាមួយរយៈកន្លងទៅនេះមានក្រុមឈ្មួញនាំចូលគ្រឿងសំណង់ដូចជា ក្ដាម បង្គា មឹក ក្នុងមួយថ្ងៃៗរាប់សិបតោន ហើយទំនិញទាំងនេះមួយផ្នែកមានលាយសារធាតុគីមីដើម្បីទុកឲ្យបានយូរ។
ការដែលឈ្មួញនាំចូលគ្រឿងសមុទ្រតាមច្រកព្រែកចាក យ៉ាងរលូនគឺមានការឃុបឃិតបើកដៃពីសំណាក់មន្ត្រីកាំកុងត្រូល មន្ត្រគយ និងនគរបាលអន្តោប្រវេសន៍ជាដើម ព្រោះពួកគេគិតតែពីរឿងប្រមូលលុយដាក់ហោប៉ៅយ៉ាងសុខស្រួល។ ក្នុងនោះលោក ហេង សំបូរ មេគយខេត្តកំពត គឺជាអ្នកបើកដៃឲ្យកូនចៅនៅច្រកព្រែកចាក ធ្វើអ្វីៗតាមអំពើចិត្ត ជាពិសេសការបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងម្ហូបអាហារមានលាយសារធាតុគីមីដើម្បីជាថ្នូរនឹងផលប្រយោជន៍។
សមត្ថកិច្ចនិងមន្ត្រីអាជ្ញាធរមូលដ្ឋានក្នុងស្រុកកំពង់ត្រាច បានឲ្យដឹងថា ក្រៅពីសមុទ្រគឺឈ្មួញកំពុងនោះចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ស្រេចតែអំពើចិត្ត ហើយឈ្មួញត្រូវបង់លុយឲ្យសមត្ថកិច្ចនៅច្រកព្រំដែនតាមការកំណត់។ ប្រភពបានឲ្យដឹងទៀតថា បន្លែ ផ្លែឈើ និងទឹកស៊ុបទាំងប៊ីដុងៗ ត្រូវឈ្មួញនាំចូលតាមច្រកព្រែកចាកយ៉ាងពេញបន្ទុកជារៀងរាល់ថ្ងៃ ហើយមន្ត្រីកាំកុងត្រូល មន្ត្រីគយ និងនគរបាលអន្តោប្រវេសន៍ គិតតែពីឃុបឃិតគ្នាប្រមូលលុយដាក់ហោប៉ៅយកទៅចែកគ្នាធ្វើមានធ្វើបាន។ រយៈពេលប្រមាណ១ខែកន្លងទៅនេះឈ្មួញនាំចូលមឹកបង្គាក្ដាមក្នុងមួយថ្ងៃៗរាប់សិបតោនតាមច្រកព្រែកចាក ដោយគ្មានការត្រួតពិនិត្យត្រឹមត្រូវពីមន្ត្រីកាំកុងត្រូលប្រចាំច្រកនោះទេ។
ឈ្មួញដែលរកស៊ីនាំចូលគ្រឿងសមុទ្រតាមច្រកព្រែកចាក បានឲ្យដឹងថា ពួកគេបង់លុយតាមការកំណត់របស់សមត្ថកិច្ចទើបអាចនាំទំនិញទាំងនោះពីទឹកដីយួនឆ្លងកាត់ច្រកព្រែកចាក ចូលទឹកដីខ្មែរយ៉ាងរលូនហើយយកទៅលក់ចែកចាយតាមទីផ្សារក្នុងខេត្តកំពត ក៏ដូចជាយកមកលក់នៅរាជធានីភ្នំពេញ និងបណ្ដាខេត្តនានាផងដែរ។
ឈ្មួញដែលរកស៊ីនាំចូលទឹកស៊ុបនិងទំនិញផ្សេងៗតាមច្រកព្រែកចាក ក៏បានឲ្យដឹងទៀតដែរថា សមត្ថកិច្ចប្រចាំច្រកនេះមិនដែលយកចិត្តទុកដាក់ត្រួតពិនិត្យគុណភាពនោះទេ ឲ្យតែបង់លុយគ្រប់តាមការកំណត់របស់សមត្ថកិច្ចគឺអាចដឹកជញ្ជូនទំនិញទៅដល់គោលដៅយ៉ាងរលូន។
ប្រការនេះថ្នាក់ដឹកនាំក្រសួងពាណិជ្ជកម្ម និងលោក ម៉ក់ ពេជ្ជរិទ្ធ អគ្គនាយកនៃអគ្គនាយកដ្ឋានកាំកុងត្រូល គួរពិនិត្យមើលភាពអសកម្មនិងអំពើពុករលួយរបស់មន្ត្រីកាំកុងត្រូលប្រចាំច្រកទ្វារអន្តរជាតិព្រែកចាកជាបន្ទាន់ ព្រោះឈ្មួញកំពុងនាំគ្រឿងឧបភោគបរិភោគខូចគុណភាពមានលាយសារធាតុគីមីមកបំផ្លាញសុខភាពប្រជាពលរដ្ឋខ្មែរយ៉ាងកំរោល។
ចំណែកលោក គុណ ញឹម អគ្គនាយកគយ ក៏គួរពិនិត្យមើលអំពើពុករលួយរបស់មន្ត្រីគយនៅច្រកព្រែកចាកខ្លះផង ព្រោះការបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ធ្វើឲ្យរដ្ឋខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុង១ខែៗ ហើយលុយទាំងនោះចូលទៅក្នុងហោប៉ៅមន្ត្រីគយពុករលួយដែលគិតគូរតែរឿងផលប្រយោជន៍ផ្ទាល់ខ្លួន៕
