មេឈ្មួញ ហាក់ ម៉ៅ ដែលអាងស្បែកជាមន្ត្រីយោធាហើយរកស៊ីដឹកជញ្ជូនទំនិញគេចពន្ធយកមកចែកចាយក្នុងរាជធានីភ្នំពេញតាមអំពើចិត្តនោះបានធ្វើឲ្យរដ្ឋខាតបង់ប្រាក់ចំណូលយ៉ាងច្រើនសន្ធឹកសន្ធាប់ក្នុង១ឆ្នាំៗ។ គ្រាន់តែឃ្លាំងស្តុកទំនិញរបស់មេឈ្មួញហាក់ ម៉ៅ នៅសងខាងផ្លូវលេខ២០០២ ភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ បានបង្ហាញយ៉ាងច្បាស់ពីការបាត់បង់ចំណូលពន្ធរាប់លានដុល្លារក្នុងមួយខែៗ។ បញ្ហានេះ អង្គភាពប្រឆាំងអំពើពុករលួយ អគ្គនាយកដ្ឋានគយនិងស្ថាប័នពាក់ព័ន្ធដទៃទៀតត្រូវចាត់វិធានការទប់ស្កាត់ជាបន្ទាន់កុំឲ្យអ្វីៗបន្តរាលដាលកាន់តែខ្លាំង។
ប្រភពពីមន្ត្រីយោធាដែលស្និទ្ធនឹងមេឈ្មួញ ហាក់ ម៉ៅ បានឲ្យដឹងថាថ្មីៗនេះមានមន្ត្រីយោធាជាន់ខ្ពស់២រូបដែលធ្លាប់ធ្វើជាខ្នងបង្អែកឲ្យ ហាក់ ម៉ៅ នាពេលកន្លងមកបានព្រមានឲ្យឈ្មួញរូបនេះប្រុងប្រយ័ត្នចំពោះមុខរបររបស់ខ្លួន។ មន្ត្រីយោធាជាន់ខ្ពស់បានតម្រូវឲ្យមេឈ្មួញហាក់ ម៉ៅ កាត់បន្ថយការនាំចូលទំនិញគេចពន្ធនិងទំនិញខុសច្បាប់តាមអំពើចិត្តតទៅទៀត ព្រោះបើអង្គភាពប្រឆាំងអំពើពុករលួយចាត់វិធានការស៊ើបអង្កេត គេមិនអាចជួយបានទ្បើយ។ ប្រការនេះបានធ្វើឲ្យមេឈ្មួញ ហាក់ ម៉ៅ កំពុងប្រឈមនឹងបញ្ហាលំបាកមួយចំនួនព្រោះការព្រមានពីចៅហ្វាយនាយរបស់ខ្លួនមិនមែនជារឿងលេងសើចនោះទេ។
មន្ត្រីយោធាស្និទ្ធនឹងហាក់ ម៉ៅ បានឲ្យដឹងទៀតថាកន្លងមកអ្នកដែលព្រមាននោះគឺជាខ្នងបង្អែកយ៉ាងរឹងមាំរបស់ ហាក់ ម៉ៅ ហើយក៏ជាអ្នកមានទំនាក់ទំនងជិតស្និទ្ធជាមួយលោក ហ៊ុន សែន ផងដែរ។ ប៉ុន្តែក្នុងពិធីជួបជុំមួយមន្ត្រីយោធាជាន់ខ្ពស់រូបនោះបានព្រមានមេឈ្មួញ ហាក់ ម៉ៅ នៅចំពោះមុខតែម្តងឲ្យប្រុងប្រយ័ត្ននិងកាត់បន្ថយការនាំចូលទំនិញគេចពន្ធនឹងទំនិញខុសច្បាប់ ព្រោះស្ថាប័នពាក់ព័ន្ធមួយចំនួនកំពុងស៊ើបអង្កេតរឿងនេះយ៉ាងប្រកិតបំផុត ហើយបើមានបញ្ហាកើតទ្បើងគេមិនអាចជួយអ្វីបានទ្បើយ។ ការព្រមាននោះធ្វើឲ្យហាក់ ម៉ៅ ធ្លាក់ទឹកមុខយ៉ាងខ្លាំងព្រោះការរកស៊ីនាំចូលទំនិញគេចពន្ធនិងទំនិញខុសច្បាប់របស់ខ្លួនត្រូវបានគេដឹងឮជាសាធារណៈរួចទៅហើយ៕
