ប៉ោយប៉ែតៈ ដោយមានការចេញផ្សាយរបស់កាសែត និងក្រុមគេហទំព័រមួយចំនួនខ្លះមក ត្រូវបានក្រុមអាជីវករត្អូញត្អែរខ្សឹបតាមទូរស័ព្ទផ្តល់ឱ្យការិយាល័យរបស់យើងដឹងថា វរៈ ៩១១ របស់លោក សូ ចាន់ណារី លួចបើកបង្ហូរទំនិញគេចពន្ធ និងលោតឆ័ត្រគ្រប់ប្រភេទចូលតាមច្រករបៀងខាងលិចជាប់កាស៊ីណូផ្កាយ ៥ យ៉ាងមមាញឹកបំផុតមិនខ្លាចការព្រមានរបស់ឧត្តមសេនីយ៍ ខេង សុមេធ ឡើយ ។
សកម្មភាពនាំចូលទំនិញទាំងនោះ ចាប់ពីម៉ោង ១០ យប់ រហូតដល់ទាបភ្លឺ ដែលនាំចូលនូវទំនិញហួសដឺឡេ និងមិនល្អគ្រប់ប្រភេទដែលមានដូចជា បន្លែ បង្កា គ្រឿងទេសអីវ៉ាន់ចាប់ហួយ ពងមាន់ ពងទា ជង្គង់មាន់ ស៊ុតមាន់ ប្រហិត (ដែលជាទំនិញហាមឃាត់)គ្រប់ប្រភេទ ។ នាំចូលក្នុង ១យប់ៗ រាប់សិបតោនយកទៅចែកចាយក្នុងទីផ្សារប៉ោយប៉ែត និងហួស ទៅកាន់ទីផ្សារទីរួមខេត្ត សេរីសោភ័ណ សៀមរាប បាត់ដំបង ពោធិ៍សាត់ កំពង់ឆ្នាំង និងរាជធានីភ្នំពេញ ។
គួររំលឹកថា មុនការព្រមានរបស់ឧត្តមសេនីយ៍ ខេង សុមេធ គ្រប់ទំនិញនាំចូលតម្លៃធម្មតា គិតជាគីបការ៉ុងរទេះ ឬ១ជើង ២០ដុល្លារប៉ុណ្ណោះ ប៉ុន្តែក្រោយការព្រមានរបស់អគ្គរង ខេង សុមេធ ដែលជានាយអគ្គស្នងការរងនោះ បែរជាធ្វើឱ្យច្រក សូ ចាន់ណារី តែម្នាក់រឹតតែត្រូវប៉ាន់ និងក្រុមឈ្មួញតូចធំ រត់ទៅរកនាំអីវ៉ាន់ចូល និងចេញ គិតជាគីឡូ ១គីឡូថ្លៃចាប់ពី ៦០បាត ទៅ ១០០បាត យ៉ាងព្រហើនបំផុត ហើយដែលសកម្មភាពនាំចូលនេះ គឺទាំងក្រុមឈ្មួញ តូចធំជៀសមិនផុតពីការនាំចេញនាំចូលជាតម្រូវការក្រពះ និងតម្រូវការកាម៉ង់ពីទីផ្សារនានាជាម៉ួយនៅថៃ និងខ្មែរ ។
តាមមធ្យោបាយនាំចូល និងចេញរបស់ក្រុមឈ្មួញថៃ-ខ្មែរ ១យប់ៗចាប់ពី ៥០-៦០តោននេះ តាមរយៈរថយន្តកាមរី ប៉ាសេរ៉ូ (ឡានកាត់ទ្រុង)ហុកឡ និងតាមការអូសរទេះរបស់កម្មករ ។ ឯសម្រាប់ច្រករបៀងមានពលករសម្រុកចូលថៃ និងនាំចូលម៉ូតូក្តៅម៉ូតូគេចពន្ធ និងរថយន្តក្តៅ ហ្គាសគេចពន្ធ យ៉ាងគគ្រឹកគគ្រេងនោះ គឺជាច្រករបៀងដើមស្នួល និងព្រៃគប់នោះឯង ដែលគេថា លោក សូ ចាន់ណារី កំពុងផ្គើនទៅនឹងបទបញ្ជារបស់លោកអគ្គស្នងការរង ខេង សុមេធ ហើយលោក សូ ចាន់ណារី កំពុងត្រូវប៉ាន់បំផុតពីច្រករបៀងទាំងនោះ ។ ពាក់ពន្ធ័បញ្ហាដែលលោក សូ ចាន់ណារី លួចឲ្យទំនិញហួសដឺឡេនឹងទំនិញមិនល្អគ្រប់ប្រភេទហូរចូលមកបំផ្លាញសុខភាពប្រជាពលរដ្ឋកម្ពុជានោះមិនគួរអគ្គស្នងការមើលរំលងឡើយបើសង្ឃឹមលើស្នងការខេត្ត លោក អាត់ ខែម គាត់ងាប់ត្រគាកស្នូកមិនខ្ចីខ្វល់ ដោយខ្លាចខ្នងបង្អែករបស់លោក សូ ចាន់ ណារី គឺ ឧត្តមសេនីយ៍ សំ ជិត ដែលគេហៅថា ជាបុរសផ្ការីកគ្រប់រដូវ ។
