តាមប្រភពព័ត៌មានពីប្រជាពលរដ្ឋរស់នៅក្នុងក្រុងតាខ្មៅ និងស្រុកស្អាង ខេត្តកណ្តាល បានឲ្យដឹងថា សកម្មភាពបូមខ្សាច់ធ្វើអាជីវកម្មខុសច្បាប់ក្នុងដងទន្លេបាសាក់នៅ តែបន្តកើតមានយ៉ាងពេញបន្ទុក ដដែលព្រោះក្រុមជនល្មើស ដែលអាងមានខ្នងបង្អែករឹងមាំពួកគេនៅតែបំពានច្បាប់យ៉ាងគឃ្លើន។ ហេតុនេះហើយ ទើបក្រុមជនល្មើសនៅតែអាចបូមខ្សាច់ដោយប្រើទូកនិងសាឡង់ធំៗ ដឹកយកទៅចែកចាយតាមដេប៉ូនានាក្នុងក្រុងតាខ្មៅ និងស្រុកស្អាង ស្រេចតែអំពើចិត្ត។ ចំណែកមន្ទីរធនធានទឹក និងឧតុនិយម មន្ទីររ៉ែនិងថាមពល ខេត្តកណ្តាល ក៏ដូចជាអាជ្ញាធរខេត្តមិនចាត់វិធានការទប់ស្កាត់បទល្មើសទាល់តែសោះ ទោះបីសកម្មភាពបូមខ្សាច់នោះធ្វើឲ្យប៉ះពាល់ដល់ការរស់នៅរបស់ប្រជាពលរដ្ឋក៏ដោយ។
ដោយឡែកប្រភពព័ត៌មានពីប្រជាពលរដ្ឋរស់នៅក្នុងស្រុកកៀនស្វាយ ស្រុកល្វាឯម និងស្រុកលើកដែក ខេត្តកណ្តាល ក៏បានឲ្យដឹងដែរថា បទល្មើសបូមខ្សាច់ក្នុងដងទន្លេមេគង្គ ដោយប្រើទូកនិងសាឡង់ធំៗ នៅតែកើតមានយ៉ាងពេញបន្ទុក។ សកម្មភាពបូមខ្សាច់ខុសច្បាប់នោះ បានធ្វើឲ្យប៉ះពាល់យ៉ាងខ្លាំងដល់បរិស្ថានធម្មជាតិព្រមទាំងបាក់ដីភូមិ និងដីចម្ការរបស់ប្រជាពលរដ្ឋចូលទន្លេជាបន្តបន្ទាប់។
ប្រជាពលរដ្ឋរស់នៅតាមដងទន្លេមេគង្គ ក្នុងស្រុកគៀនស្វាយ ស្រុកល្វាឯម និងស្រុកលើកដែក ធ្លាប់អំពាវនាវឲ្យអភិបាលខេត្តកណ្តាល និងរដ្ឋមន្ត្រីក្រសួងធនធានទឹកចាត់វិធានការលើក្រុមជនល្មើសជាច្រើនលើកមកហើយ ប៉ុន្តែមិនទាន់ឃើញមានចំណាត់ការអ្វីទាំងអស់។ពាក់ព័ន្ធនឹងបញ្ហាខាងលើនេះ មន្ត្រីរាជការនៅសាលាខេត្តកណ្តាល បានឲ្យដឹងថា ប្រធានមន្ទីរធនធានទឹក និងឧតុនិយមក៏ដូចជាប្រធានមន្ទីររ៉ែ និងថាមពល ខេត្តកណ្តាល មិនហ៊ានប៉ះពាល់ក្រុមជនល្មើសបូមខ្សាច់ខុសច្បាប់នោះទេ ព្រោះសាច់ញាតិមន្ត្រីជាន់ខ្ពស់គណបក្សប្រជាជនមួយចំនួនជាអ្នកនៅពីក្រោយបទល្មើសនោះ។
អ្នកដែលជាប់ពាក់ព័ន្ធបទល្មើសបូមខ្សាច់ខុសច្បាប់មានដូចជាឈ្មោះ ផៃ ប៊ុនឈន ហៅ ឈឿន ប៊ុនឈន ជាកូនប្រុសរបស់លោក ផៃ ប៊ុនឈឿនអភិបាលខេត្តកណ្តាល, ឈ្មោះ គឿន ភារម្យ ជាកូនប្រុសរបស់លោក ឌុល គឿន ដែលជាមន្ត្រីដ៏មានឥទ្ធិពលនៅក្រសួងមហាផ្ទៃ និងឈ្មោះ សារ៉ន ឌីណា ជាកូនប្រុសលោក មួង សារ៉ន។ ដោយសារតែអ្នកជាប់ពាក់ព័ន្ធបទល្មើសបូមខ្សាច់ក្នុងខេត្តកណ្តាលសុទ្ធតែជាកូនចៅមន្ត្រីជាន់ខ្ពស់បែបនេះហើយ ទើបស្ថាប័នពាក់ព័ន្ធមិនហ៊ានចាត់វិធានការទប់ស្កាត់ ហើយសុខចិត្តទទួលយកផលប្រយោជន៍បន្តិចបន្តួចពីក្រុមជនល្មើសយ៉ាងស្ងៀមស្ងាត់៕