ខេត្តកណ្តាល ៖ មន្ត្រីនគរបាលអន្តោប្រវេសន៍ប្រចាំច្រកព្រំដែនទ្វេភាគីជ្រៃធំ ស្ថិតក្នុងស្រុកកោះធំ ខេត្តកណ្តាល បានប្រព្រឹត្តអំពើពុករលួយជិះជាន់សង្កត់សង្កិនគាបជំរិតប្រជាពលរដ្ឋ ដែលធ្វើដំណើរចេញទៅប្រទេសវៀតណាម ដើម្បីព្យាបាលជំងឺ ឬរកស៊ីដឹកជញ្ជូនទំនិញ ដោយគ្មានការយោគយល់អ្វីឡើយហើយដំណាក់កាលចុងក្រោយនេះ លោក ខឹម វិចិត្រា ត្រូវបានតែងតាំងជានាយស្នាក់ការនគរបាលអន្តោប្រវេសន៍ ប្រចាំច្រកព្រំដែនទ្វេភាគី ជ្រៃធំ បានធ្វើឲ្យប្រជាពលរដ្ឋនិងអ្នករកស៊ីដឹកជញ្ជូនទំនិញរអ៊ូរទាំពីការគាបជំរិត បង្ខំឲ្យបង់លុយតឹងតែងជាងពេលមុនៗ ប្រហែលជាលោក ខឹម វិចិត្រា កំពុងតែប្រមូលលុយយកទៅស្រង់ដើមហើយមើលទៅ។
ប្រជាពលរដ្ឋបានលើកឡើងថា សម្រាប់មនុស្សម្នាក់បើចង់ឆ្លងដែន ឬធ្វើដំណើរទៅវៀតណាម ដោយគ្មានការរំខាន ឬកោសរូសសួររកលិខិតស្នាម ត្រូវបង់លុយឲ្យនគរបាលអន្តោប្រវេសន៍របស់លោក ខឹម វិចិត្រា ចំនួន២ម៉ឺន ទៅ៣ម៉ឺនរៀល ដោយគ្មានការយោគយល់ថា ប្រជាពលរដ្ឋត្រូវឆ្លងដែនទៅពិនិត្យព្យាបាលជំងឺឬទៅរកស៊ីទិញឥវ៉ាន់បន្តិចបន្តួចនោះទេ។ ប្រជាពលរដ្ឋបានរអ៊ូរទាំទៀតថា បន្ទាប់ពីលោក ខឹម វិចិត្រា បានឡើងកាន់តំណែងជាមេនគរបាលអន្តោប្រវេសន៍ប្រចាំច្រកទ្វេភាគីជ្រៃធំ គាត់បានដាក់វិធានការរឹតបន្តឹង ការត្រួតពិនិត្យអ្នកដំណើរដែលឆ្លងកាត់ព្រំដែនជាងពេលមុនៗ ប៉ុន្តែសម្រាប់អ្នកដំណើរដែលបង់ប្រាក់តាមការតម្រូវរបស់នគរបាលអន្តោប្រវេសន៍ មិនមានការត្រួតពិនិត្យអ្វីតឹងតែងទេ។
សកម្មភាពដែលលោក ខឹម វិចិត្រា បានពង្រាយមន្ត្រីក្រោមឱវាទ ឲ្យរាប់អ្នកឆ្លងដែនដើម្បីប្រមូលលុយគឺជារឿងខុសឆ្គងខ្លាំងសម្បើមណាស់ ដែលទាមទារឲ្យផ្នែកពាក់ព័ន្ធពិនិត្យមើលភាពអសកម្មរបស់លោក ខឹម វិចិត្រា ឡើងវិញផង ។ មានការបញ្ជាក់ផងដែរថា ក្នុងមួយថ្ងៃៗ មានប្រជាពលរដ្ឋខ្មែរត្រូវធ្វើដំណើរឆ្លងដែន វៀតណាម សម្រាប់ការដើរកម្សាន្ត ការទិញទំនិញផ្សេងៗយកមកប្រើប្រាស់ក្នុងក្រុមគ្រួសារ ក៏ដូចជាប្រជាពលរដ្ឋដែលទៅព្យាបាលជំងឺ មានប្រមាណ៥០០ទៅ១០០០នាក់ ហើយបើគុណជាមួយចំនួនលុយដែលលោក ខឹម វិចិត្រា បានចាត់តាំងឲ្យមន្ត្រីក្រោមឱវាទរាប់ប្រជាពលរដ្ឋយកលុយក្នុងម្នាក់ ២ទៅ៣ម៉ឺនរៀល ឃើញថាប្រភពចំណូលមានច្រើនដល់ទៅខ្ទង់លានរៀលឯណោះក្នុងមួយថ្ងៃៗ ។
ដោយឡែក សម្រាប់ជនជាតិវៀតណាម ដែលឆ្លងដែនចូល មកលេងល្បែងនៅតាមកាស៊ីណូ ឬតាមសង្វៀនបញ្ជល់មាន់ នៅក្នុងស្រុកស្អាង ឬស្រុកកោះធំ ក្នុងមួយថ្ងៃៗប្រមាណ ៣០០ទៅ៥០០នាក់ ហើយជនជាតិយួនទាំងនោះ អាចឆ្លងដែនចូលមកប្រទេសកម្ពុជា ដោយគ្មានការត្រួតពិនិត្យលិខិតស្នាមអ្វីទាំងអស់ ដោយគ្រាន់តែបង់ប្រាក់ឲ្យមន្ត្រីនគរបាលអន្តោប្រវេសន៍របស់លោក ខឹម វិចិត្រា ចំនួន៤ម៉ឺន រៀលសម្រាប់ម្នាក់ គឺចប់រឿងទៅហើយ ។ មន្ត្រីតូចតាចមួយចំនួនបានបញ្ជាក់ថា មានជនជាតិវៀតណាម ជាច្រើន ដែលត្រូវធ្វើដំណើរចូលដល់រាជរាជធានីភ្នំពេញ ក៏អាចធ្វើបានដែរ គ្រាន់តែពឹងមេខ្យល់ឲ្យជួយរត់ការ បង់លុយឲ្យនគរបាលអន្តោប្រវេសន៍ ក្នុងម្នាក់ៗចាប់ពី៣០ដុល្លារឡើងទៅ ចង់ជនជាតិវៀតណាម ទាំងនោះ រត់ពន្ធមាស ថ្នាំពេទ្យ ឆ្លងកាត់ព្រំដែន ក៏គ្មានការត្រួតពិនិត្យអ្វីឡើយ ។
សម្រាប់ប្រជាពលរដ្ឋដែលរកស៊ីដឹកជញ្ជូនកសិផល ចេញទៅវៀតណាម ដូចជាស្រូវ ពោត សណ្តែក ល្ង ក៏ត្រូវជាប់កាតព្វកិច្ចបង់លុយជូននគរបាលអន្តោប្រវេសន៍របស់លោក ខឹម វិចិត្រា ទៅតាមការទាមទារចង់ខ្លាំងជាងជំនាញគយ និងសមត្ថកិច្ចពាក់ព័ន្ធដែលប្រចាំការនៅចំណុចព្រំដែនជ្រៃធំទៅទៀត។ មានការបញ្ជាក់ផងដែរថា អំពើពុករលួយរបស់នគរបាលអន្តោប្រវេសន៍ប្រចាំច្រកព្រំដែនទ្វេភាគីជ្រៃធំ បានកើតមានជាយូរមកហើយ ប៉ុន្តែគ្មានការកែទម្រង់ទាល់តែសោះ ដែលរហូតមកដល់ពេលនេះលោក ខឹម វិចិត្រា កាន់តែមានឱកាសប្រមូលលុយពីប្រជាពលរដ្ឋដែលឆ្លងដែនចេញទៅវៀតណាម និងគាបជំរិតឲ្យជនជាតិយួនដែលឡើងមកលេងកាស៊ីណូក្នុងស្រុកកោះធំ បង់លុយដោយគ្មានការត្រួតពិនិត្យអ្វីឡើយ ហើយគេអាចចាត់ទុកថា នេះជារឿងពុករលួយក៏ដោយសារតែការបង់ប្រាក់គ្មានវិក្កយបត្រ។
ច្រកព្រំដែនទ្វេភាគីជ្រៃធំនេះផងដែរ គឺជាចំណុចឆ្លងកាត់ដ៏សំខាន់នៃការនាំចេញទំនិញខុសច្បាប់ពីប្រទេសកម្ពុជាទៅវៀតណាម ដូចជាការនាំចេញសត្វព្រៃ ឈើគ្រញូង ឈើប្រណីត ដែលមានរូបភាពយ៉ាងគគ្រឹកគគ្រេង គឺជាប្រភពចំណូលមិនធម្មតាទេសម្រាប់លោក ខឹម វិចិត្រា ហើយក្រុមឈ្មួញធំៗដែលរកស៊ីនាំចូលត្រីខុសច្បាប់ ទំនិញគេចពន្ធមានប្រភេទគ្រឿងសំណង់ ស៊ីម៉ងត៍ ឥដ្ឋការ៉ូ ជ្រូក មាន់ ទា មកពីស្រុកយួនយ៉ាងអនាធិបតេយ្យនាពេលបច្ចុប្បន្ននេះ គេសង្កេតឃើញជំនាញនគរបាលអន្តោប្រវេសន៍របស់លោក ខឹម វិចិត្រា ក៏កំពុងតែសប្បាយក្នុងការប្រមូលលុយយកទៅច្រកហោប៉ៅធ្វើមានធ្វើបានផ្ទាល់ខ្លួនផងដែរ ហើយផលប្រយោជន៍ដែលលោក ខឹម វិចិត្រា ប្រមូលបានក្នុងមួយថ្ងៃៗរាប់សិបលានរៀលនោះ ទំនងជាយកមកបែងចែកជូនថ្នាក់លើខ្លះដែរហើយមើលទៅ៕
