អំពើពុករលួយជាច្រើនករណីរបស់លោក តាក វណ្ណថា ស្នងការនគរបាលខេត្តព្រះសីហនុ ដែលកើតមានជាច្រើនឆ្នាំទៅហើយនោះ គ្មានការកែទម្រង់ទេ ហើយក្រោយពេលក្រុមអធិការកិច្ចបញ្ចប់ការស៊ើបអង្កេត គេសង្កេតឃើញលោក តាក វណ្ណថា កាន់តែមានអំណួតក្អេងក្អាងជាងមុន ហើយប្រាប់មនុស្សជំនិតៗរបស់គាត់ថា គ្មាននរណាអាចធ្វើ អ្វីគាត់បានទេ។
មន្ត្រីជាច្រើនតាមអង្គភាព និងការិយាល័យ ចំណុះឲ្យស្នងការដ្ឋាននគរបាលខេត្តព្រះសីហនុបានសម្តែងការមិនពេញចិត្ត ចំពោះលោក តាក វណ្ណថា យូរយារណាស់មកហើយ ព្រោះអំពើពុករលួយនិងបក្ខពួកនិយមបានបង្កឲ្យមន្ត្រីមួយចំនួនឈឺចាប់ យ៉ាងខ្លាំង ដូចជាការកាត់ប្រាក់ខែតាមតែអំពើចិត្តរួមទាំងរបបបេសកកម្មផងដែរ ធ្វើឲ្យមន្ត្រីនគរបាលតូចតាចរងទុក្ខវេទនា បាក់ទឹកចិត្តក្នុងការបំពេញការងារ។ សម្រាប់បក្ខពួកឬសាច់ញាតិរបស់លោក តាក វណ្ណថា ត្រូវបានឡើងស័ក្តិ ឡើងតំណែងក្នុង១ឆ្នាំ ២-៣ដង ហើយមានឱកាសក្តោបប្រភពចំណូលសេដ្ឋកិច្ចដើម្បីអភិវឌ្ឍន៍មុខតំណែង និងជីវភាពគ្រួសារយ៉ាងងាយស្រួលបំផុត មិនដែលខ្វល់ខ្វាយពីភាពអសកម្មដែលកំពុងកើតមានក្នុងសង្គម ដូចជាបញ្ហាប្រើប្រាស់ជួញដូរគ្រឿងញៀន ល្បែងស៊ីសង និងអំពើឆក់ប្លន់បាញ់សម្លាប់ ធ្វើឲ្យប្រជាពលរដ្ឋបាត់បង់ភាពកក់ក្តៅ។
គេមិនច្បាស់ទេថា តើលោក តាក សារិទ្ធ និងលោក សាន់ ប៊ុនថន យកប្រាក់ដែលបានមកពីអំពើខុសច្បាប់ទាំងនេះ ទៅបែងចែកលោកស្រី ប៉ែន កញ្ញា និងលោកស្នងការ តាក វណ្ណថា ប៉ុន្មាននោះទេក្នុងមួយខែៗទើបភាពអសកម្មរបស់មន្ត្រីទាំង ២នាក់នេះ មិនដែលត្រូវបានថ្នាក់លើចាប់កំហុស។
មន្ត្រីនគរបាលតូចតាចជាច្រើនបានសម្តែងភាពឈឺចាប់និងក្តៅក្រហាយ យ៉ាងខ្លាំងចំពោះអំពើកេងប្រវ័ញ្ចញើសឈាម ការកាត់កងប្រាក់ខែដែលលោកស្រី ប៉ែន កញ្ញា និងលោកស្នងការតាក វណ្ណថា បាននិងកំពុងប្រព្រឹត្តតាមតែទំនើងចិត្ត។ រឿងដែលអាក្រក់បំផុតនោះគឺ ពាក់ព័ន្ធនឹងការប្រឡងជ្រើសរើសមន្ត្រីនគរបាលចូលក្របខ័ណ្ឌថ្មីចំនួន ៣៦នាក់ កាលពីខែកញ្ញា ឆ្នាំ២០១២ កើតមានអំពើពុករលួយក្នុងកម្រិតខ្ពស់ ហើយអ្នកប្រឡងចូលក្របខ័ណ្ឌថ្មីបានចំណាយលុយមិនតិចជាង ៥ពាន់ដុល្លារអាមេរិកទេ ពោលគឺកូនអ្នកក្រទោះជាមានសមត្ថភាព មានកាយសម្បទាគ្រប់គ្រាន់ក៏គ្មានឱកាសប្រឡងចូលក្របខ័ណ្ឌនគរបាលជាតិ ដែរ ព្រោះតែអំពើពុករលួយរបស់លោកស្រី ប៉ែន កញ្ញា និងលោកស្នងការ តាក វណ្ណថា៕
