តុលាការថៃមួយកាលពីថ្ងៃព្រហស្បត៍បានដាក់គុកបុរសស៊ុយអ៊ែត ដើមកំណើរលីបង់ម្នាក់ចំពោះការមានវត្ថុធាតុដែលអាចផលិតជាគ្រឿងផ្ទុះ។ អាតរីស ហ៊ូសសេន អាយ៤៩ឆ្នាំ ត្រូវបានកាត់ទោសអោយជាប់គុក២ឆ្នាំ និង៨ខែ។ បុរសនេះត្រូវបានចាប់ខ្លួនកាលពីខែមករាឆ្នាំ២០១២នៅអាកាសយានដ្ឋាន ក្រុងបាងកកមួយបន្ទាប់ពីត្រូវបានព្រមានពីអាមេរិកនិងអ៊ីស្រាអ៊ែល អំពីការគំរាមដែលអាចកើតមាន។
ហ៊ូសសេន ដែលនៅតែអះអាងថាខ្លួនមិនបានប្រព្រឹត្តខុសបាននាំប៉ូលិសទៅកាន់ អាគារមួយដែលស្តុកទុកជីគីមីនិងសារធាតុអាម៉ូញ៉ូមនីត្រាត។ ការមាន អាម៉ូញ៉ូម នីត្រាត ដែលអាចប្រើក្នុងកសិកម្ម ទាមទារអោយមានការអនុញ្ញាតនៅថៃ។ ចៅក្រមតុលាការបាននិយាយថា “ជនជាប់ចោទបានលាក់ទុកវត្ថុធាតុខុសច្បាប់និងអាចបង្កការប្រឈម សន្តិសុខ តែពីព្រោះគាត់សហការជាមួយអាជ្ញាធរ គាត់ត្រូវបានបន្ថយទោសពី៤ឆ្នាំមកនៅ២ឆ្នាំ៨ខែ”។ មេធាវីរបស់ហ៊ូសសេនបាននិយាយថា លោកនឹងសុំការបន្ធូរបន្ថយទោសបន្ថែម ដោយថាកូនក្តីរបស់លោកបានជាប់គុកមួយឆ្នាំ ៨ខែរួចមកហើយ។ អាជ្ញាធរបានចោទប្រកាន់ហ៊ូសសេនថាមានទំនាក់ទំនងជាមួយក្រុមហេហ្ស៍ បូឡា ដែលជាចលនាអ៊ីស្លាមនិយមនៅលីបង់ដែលមានការគាំទ្រដោយអ៊ីរ៉ង់ និងស៊ីរី។ ជនជាប់ចោទនិយាយថា ខ្លួនជាធុរជនម្នាក់ដែលរកស៊ីខាងនាំចេញទំនិញពីថៃទៅកាន់ប្រទេស ផ្សេងៗ រួមទាំងលីបង់ និងថាករណីរបស់ខ្លួនមិនពាក់ព័ន្ធនឹងការផ្ទុះគ្រាប់នៅក្រុងបាងកក កាលពីថ្ងៃ១៤កុម្ភៈឆ្នាំមុនដែលប្រព្រឹត្តឡើងដោយជនជាតិអ៊ីរ៉ង់៕
