0

លោក ខាត់ សារ៉ាត់ មេនគរបាលអន្តោប្រវេសន៏ចក្រទ្វារអន្តរជាតិបាវិតកំពុងតែប្រព្រឹត្តអំពើពុករលួយកាន់តែខ្លាំងជាងមុន?

ខេត្តស្វាយរៀង៖ សមត្ថកិច្ច​ពាក់ព័ន្ធ​នៅ​ច្រកទ្វារ​អន្តរជាតិ​បាវិត ក្រុង​បាវិត ខេត្តស្វាយរៀង បាន​ឲ្យ​ដឹងថា លោក​ឧ​ត្ត​ម​សេនីយ៍​ត្រី ខាត់ សារ៉ាត់ មេ​ប៉ុស្ដិ៍នគរបាល​អន្តោប្រវេសន៍​ច្រក​បាវិត កំពុង​ប្រើ​តួនាទី​និង​អំណាច​ប្រព្រឹត្ត​អំពើពុករលួយ​កាន់តែខ្លាំង​ក្លា​ជាង​មុន​ដោយ​គ្មាន​ញញើត​អ្វី​ទាំងអស់​។ ប្រភព​បាន​ឲ្យ​ដឹង​ទៀតថា ដោយសារ​អាង​មាន​ខ្នងបង្អែក​រឹងមាំ​នៅក្នុង​ក្រសួងមហាផ្ទៃ និង​នៅក្នុង​អគ្គនាយកដ្ឋាន​អន្តោប្រវេសន៍​ទើប​លោក ខាត់ សារ៉ាត់ ហ៊ាន​ធ្វើ​អ្វីៗ​តាម​អំពើ​ចិត្ត​របស់ខ្លួន ហើយ​យកឈ្មោះ​មន្ត្រី​ធំៗ​មក​ប្រើ​ដើម្បី​បិទបាំង​អំពើពុករលួយ​របស់ខ្លួន​ទៀតផង​។ ហេតុនេះ​លោក ឱម យ៉ិនទៀង ប្រធាន​អង្គភាព​ប្រឆាំង​អំពើពុករលួយ មិនគួរ​មើលរំលង​រឿងអាស្រូវ​ពុករលួយ​របស់លោក ខាត់ សារ៉ាត់ តទៅទៀត​ទេ ហើយ​គួរ​បើក​ការស៊ើបអង្កេត​ឲ្យ​បាន​ស៊ីជម្រៅ​។​

បណ្ដាញ​ព័ត៌មាន​នានា​បាន​ចុះផ្សាយ​ជា​បន្តបន្ទាប់​ជុំវិញ​រឿងអាស្រូវ​ពុករលួយ​ពេញទំហឹង​របស់លោក​ឧ​ត្ត​ម​សេនីយ៍​ត្រី ខាត់ សារ៉ាត់ ដែលជា​នាយ​ប៉ុស្ដិ៍នគរបាល​អន្តោប្រវេសន៍​ច្រកទ្វារ​អន្តរជាតិ​បាវិត ក្រុង​បាវិត ខេត្តស្វាយរៀង​។ ដូច្នេះ​លោក ខាត់ សារ៉ាត់ មិនអាច​បិទបាំង​អំពើពុករលួយ​និង​រឿងអាស្រូវ​តាមច្រើន​រូបភាព​របស់​ខ្លួន​បានឡើយ ជាពិសេស​ទាក់ទង​ទៅនឹង​ករណី​គាប​យកលុយ​ពី​ក្រុម​ឈ្មួញ​និង​ក្រុមហ៊ុន​នាំចូល​ទំនិញ​ពី​ស្រុក​យួន​តាម​ច្រកទ្វារ​អន្តរជាតិ​បាវិត​។ ប៉ុន្តែ​ទោះបី​រឿងអាស្រូវ​ពុករលួយ​របស់លោក ខាត់ សារ៉ាត់ ត្រូវបាន​បើក​កកាយ​ជា​បន្តបន្ទាប់​យ៉ាងណាក៏ដោយ ក៏​ថ្នាក់ដឹកនាំ​ក្រសួងមហាផ្ទៃ និង​នាយ​ឧ​ត្ត​ម​សេនីយ៍ គៀត ច័ន្ទ​ថា​រិ​ទ្ធ អគ្គនាយក​នៃ​អគ្គនាយកដ្ឋាន​អន្តោប្រវេសន៍ ធ្វើ​មិនដឹងមិនឮ​អ្វី​ទាំងអស់ ហើយ​ទុក​ឲ្យ​លោក ខាត់ សារ៉ាត់ បន្ត​ប្រព្រឹត្ត​អំពើពុករលួយ​ខ្លាំងក្លា​ជាង​មុន​ទៅទៀត​។​

ប្រភពពី​មន្ត្រីនគរបាល​នៅក្នុង​អគ្គនាយកដ្ឋាន​អន្តោប្រវេសន៍​មួយចំនួន​បាន​បង្ហើប​ឲ្យ​ដឹងថា ដោយសារ​អាង​មាន​លោក គៀត ច័ន្ទ​ថា​រិ​ទ្ធ អគ្គនាយក​នៃ​អគ្គនាយកដ្ឋាន​អន្តោប្រវេសន៍ ក្រសួងមហាផ្ទៃ ជា​បង្អែក​រឹងមាំ​ទើប​លោក ខាត់ សារ៉ាត់ ហ៊ាន​បង្កើន​សកម្មភាព​ប្រព្រឹត្ត​អំពើពុករលួយ​ច្រើនបែប​ច្រើនយ៉ាង​ស្រ​ច​តែ​អំពើ​ចិត្ត​។ ក្នុងនោះ​ការឃុបឃិត​ឲ្យ​ជនជាតិខ្មែរ​និង​ជនជាតិ​យួន​ឆ្លងដែន​តាម​ច្រក​របៀប​២​កន្លែង​នៅជាប់​ខាងជើង​និង​ខាងត្បូង ច្រកទ្វារ​អន្តរជាតិ​បាវិត ត្រូវបាន​គេ​ដឹងថា ជា​ប្រភព​ចំណូល​ដ៏​សំខាន់​របស់លោក ខាត់ សារ៉ាត់ ព្រមទាំង​បក្ខពួក​ដែលមាន​ការឃុបឃិត​គ្នា​ជា​ប្រព័ន្ធ​។ ប្រភពពី​សមត្ថកិច្ច​ពា​ក់​ព័ន្ធ​នៅ​ច្រកទ្វារ​អន្តរជាតិ​បាវិត បាន​អះអាងថា លោក ខាត់ សារ៉ាត់ កំពុង​យក​តួនាទី​និង​អំណាច​របស់ខ្លួន​ប្រើប្រាស់​ដើម្បី​ប្រមូល​លុយ​តាមរបៀប​ពុករលួយ ហើយ​មិន​ខ្វល់​ពី​ការរិះគន់​អ្វី​ទាំងអស់​។ បញ្ហា​នេះ​គឺជា​រឿង​ដែល​ថ្នាក់ដឹកនាំ​ក្រសួងមហាផ្ទៃ មិនគួរ​បណ្ដែតបណ្ដោយ​តទៅទៀត​ទេ ព្រោះ​លោក គៀត ច័ន្ទ​ថា​រិ​ទ្ធ អគ្គនាយក​នៃ​អគ្គនាយកដ្ឋាន​អន្តោប្រវេសន៍ ត្រូវបាន​គេ​ដឹងថា ជា​បង្អែក​រឹងមាំ​របស់លោក ខាត់ សារ៉ាត់ និង​បក្ខពួក​។

ថ្មីៗ​នេះ​ប្រភពពី​តំណាង​ក្រុមហ៊ុន ក៏ដូចជា​អ្នក​រត់ការ​ឯកសារ​នាំចូល​ទំនិញ​តាម​ច្រកទ្វារ​អន្តរជាតិ​បាវិត បាន​បង្ហើប​ឲ្យ​ដឹងថា ទោះបី​ពួកគេ​នាំចូល​ទំនិញ​បង់​ពន្ធគយ​ត្រឹមត្រូវ​ក៏ដោយ ក៏​ចៀស​មិន​ផុតពី​បង់លុយ​លើ​តុ​ក្រោម​តុ​តាម​ការកំណត់​របស់លោក ខាត់ សារ៉ាត់ មេ​នគរបាល​អន្តោប្រវេសន៍​ច្រកទ្វារ​អន្តរជាតិ​បាវិត ឡើយ​។ ជាងនេះទៅទៀត​ក្រុម​ឈ្មួញ​មួយចំនួន​ដែល​នាំចូល​ទំនិញគេចពន្ធ ទំនិញ​បង់ពន្ធ​មិន​គ្រប់ និង​ទំនិញ​ខុសច្បាប់​តាម​ច្រកទ្វារ​អន្តរជាតិ​បាវិត គឺជា​ប្រភព​ចំណូល​ដ៏​ធំ​របស់លោក ខាត់ សារ៉ាត់ តែម្ដង​ព្រោះ​លោក ខាត់ សារ៉ាត់ គិតតែ​ពី​រឿង​ប្រមូល​លុយ​ធ្វើ​មាន​ធ្វើបាន​ផ្ទាល់ខ្លួន ហើយ​មិន​ខ្វល់​ពី​ការរិះគន់​អ្វី​ឡើយ​។ ប្រភពពី​មន្ត្រី​ពាក់ព័ន្ធ​នៅ​ច្រកទ្វារ​អន្តរជាតិ​បាវិត បាន​ឲ្យ​ដឹងថា កន្លងមក​លោក ខាត់ សារ៉ាត់ តែង​ប្រើប្រាស់​ឈ្មោះ​នាយ​ឧ​ត្ត​ម​សេនីយ៍ គៀត ច័ន្ទ​ថា​រិ​ទ្ធ អគ្គនាយក​នៃ​អគ្គនាយកដ្ឋាន​អន្តោប្រវេសន៍ ធ្វើជា​បង្អែក​ក្រាស់ឃ្មឹក​របស់ខ្លួន ហើយ​បន្ត​ប្រើ​តួនាទី​និង​អំណាច​ប្រមូល​លុយ​តាមច្រើន​រូបភាព​យ៉ាង​សុខ​ស្រួល​បំផុត​៕

ចុះផ្សាយក្នុង៖ ព័ត៌មានខ្សឹបឲ្យដឹង, ព័ត៌មានជាតិ, ព័ត៌មាន​ពិសេស, ព័ត៌មានស៊ីជម្រៅ
©២០១៣ រក្សាសិទ្ធ​គ្រប់​បែប​យ៉ាង​ដោយ​សារ​ព័ត៌មាន​ចាប់​ដៃ មិន​អនុញ្ញាត​ឲ្យ​ដក​ស្រង់​នូវ​ផ្នែក​ណា​មួយ​ នៃ​ការ​ចុះផ្សាយ​នេះ​តាម​រយៈ​ការ​បោះពុម្ព តាម​ប្រព័ន្ធ​អេឡិច​ត្រូនិច ផ្សាយ​តាម​រលក​ធាតុអាកាស សរសេរ​ឡើង​វិញ ឬ ចែកចាយ ដោយ​គ្មាន​ការ​យល់ព្រម​ជា​លាយ​លក្ខណ៍​អក្សរ​ពី​ចាងហ្វាង​ការ​ផ្សាយ​ឡើយ។

Recent Posts

©២០១៣ រក្សាសិទ្ធ​ដោយ​សារព័ត៌មាន​ចាប់​ដៃ | ទូរស័ព្ទ៖ 077 56 79 79 | អ៊ីម៉ែល៖ chabdainews@gmail.com

សហការផ្តល់ព័ត៌មាន៖ 077 56 79 79 | អ៊ីម៉ែល៖ chabdainews@gmail.com

បង្ហោះគេហទំព័រ​ដោយ MyWeb Services៖ | ព័ត៌មានបន្ថែម៖ 092 266 264 ឬ info@myweb-service.com