រឿងអាស្រូវរបស់ពួកគយធ្វើជាមេគយប្រព្រឹត្តអំពើពុករលួយរបស់ពួក មេសាខាគយ ស្ទើរតែទាំងអស់ហ្នឹងក៏ប៉ុន្តែ មានមេគយខ្លះ គាត់គិតជាតិចេះស៊ីលួចគៃបំបាត់ពន្ធរដ្ឋហើយមិនខ្ចះខ្ជាយដល់ ថ្នាក់ដាច់ក្រឡុះពួយ១ទំហឹងលែងគិតពីការ ប្រមូលពន្ធចូលរដ្ឋដូចជា ថោង សុខាំភូ ជាមេសាខាគយខេត្តបន្ទាយមានជ័យ ដ៏ល្បីល្បាញខាងប្រព្រឹត្តអំពើពុករលួយ ដាក់កុងត្រូលជជូះ និងឃុបឃិតឱ្យឈ្មួញនាំចូលទំនិញខុសច្បាប់ និងបង់ពន្ធមិនគ្រប់ជាថ្នូរ និងលុយថ្ងៃ ១ឡានតូច ៥០-១០០ដុល្លារ និងចំពោះឈ្មួញតូតាចចូលហ៊ុនគ្នាបង់លុយខែឱ្យមេសាខាគយ ១៥០-៣០០ដុល្លារ-៥០០ដុល្លារ តាមប្រភេទឡានតូចឡានធំគ្រប់ទឹកត្រូវប៉ាន់បំផុត ។
គេគណនាមេ គយ ថោង សុខាំភូ តាំងពីចេញពីមេគយស្រែអំបិលទៅកាន់ជាមេសាខាគយប្រចាំខេត្ត បន្ទាយមានជ័យវិញ នោះ ចំនួនប៉ុន្មានខែប៉ុន្មានឆ្នាំមកហើយ ។ ហើយបើគេដឹងក្រុមឈ្មួញនាំទំនិញគេចពន្ធចូលមកពីថ្ងៃតាមផ្លូវ អន្តរជាតិខ្លះ និងតាម ច្រករបៀង ៩០% ស្មើឱ្យជាង ២០០នាក់ ឈ្មួញនោះហើយគុណលុយខែ ២០០ ឈ្មួញនោះគេ និងដឹងថា លុយដែលគាត់ ប្រមូលបានប៉ុន្មានប្រចាំឆ្នាំប្រចាំខែមកនេះគេសួរថា តើយកទៅណាអស់ ។ បញ្ហាពុករលួយបែបនេះគេពុំទាន់និយាយពីការ ឃុបឃិតបង់ពន្ធតាមបបេមាត់ដូចដែលគេថាឱ្យតែខ្សែមា សាច់ញាតិ ឬធំខាងលើ គឺបង់ត្រឹមតែ ១០%-៣០%ប៉ុណ្ណោះ ទុក ៣០% បង់ចូលហោប៉ៅផ្ទាល់មេគយ ៣០% ទុកធ្វើសេដ្ឋីផ្ទាល់ខ្លួន និងវិធទ្សនាធ្វើឱ្យទំនិញឡើងថ្លៃបញ្ចុះថ្លៃតាមទំនើងចិត្ត និង១០%ទៀតថា ទុកបង់ចូលបក្សស្រេចជាបង្អែកការពារក្រុមអ៊ុកឡុកចាប់ទំនិញផ្តេស និងរត់ការផ្លូវបញ្ហាបង្អែករឹងបែបនេះ គេសួរថា តើនរណាមកហ៊ានចាប់បង្ក្រាបបានចំពោះទំនិញខុសច្បាប់ចេញពីចង្វែកដៃ គយនោះ ។
ឧទាហរណ៍ជាក់ស្តែង ប្រសិនជាទំនិញដែលគ្មានខ្សែធំ និងខ្នងបង្អែកប្រសិនហ៊ានលោតឆ័ត្រ និងត្រូវបណ្តាញ ថោង សុខាំភូ រាយការណ៍ឱ្យជញ្ជក់ឈាមតាមដងផ្លូវដូចបិសាចជញ្ជក់ឈាម ឬចាប់បង្ក្រាបថតដាក់ទូរទស្សន៍ឡង់សេបុងយកស្នាដៃគយល្អ តែម្តង ។
ផ្ទុយទៅវិញ ចំពោះរឿងគយក្រុមថោង សុខាំភូ ឱ្យរថយន្តឈ្មួញដាក់ខែ ដាក់ថ្ងៃបង់ចូលផ្ទាល់ហោប៉ៅគយ និងគៃបំបាត់ពន្ធ រដ្ឋ ឬលួចពន្ធរដ្ឋនៅចំណុចផ្លូវ ៥០ ក្នុងភូមិកូនដំរី សង្កាត់និមិត្ត ក្រុងប៉ោយប៉េត តម្រូវឱ្យអាជីវករដែលដឹកទំនិញទាំងនោះ ត្រូវពាក់តែស្លាកលេខខាងមុខ ដោះខាងក្រោយចេញ ពេលធ្វើដំណើរមកដល់ចំណុចខាងលើដោយមិនចាំបាច់ឈប់ទេ គ្រាន់តែញាក់ភ្លើង២ដង មានអ្នកចាំកត់ចំនួនឡានទុកហើយ រីឯអាជីវករដែលបង់ចំនួនក្បាលឡានគឺត្រូវដោះស្លាកលេខ ទាំងមុខ ទាំងក្រោយចេញ ឬត្រូវពាក់ស្លាកលេខទាំងមុខទាំងក្រោយ ដើម្បីឱ្យគេងាយចំណាំនោះ គឺកើតមានដុះស្លែយូរឆ្នាំមក ហើយ ម៉ូដឺផាប៉ះរបស់គយបន្ទាយមានជ័យ។ ហើយបើ ចំពោះរថយន្តណាដែលបានធ្វើតាមអ្វីដែលគយប្រាប់ គឺនឹងត្រូវបានកម្លាំងរបស់គយបើករថយន្តប្រដេញចាប់ពេញដងផ្លូវជាតិ បើរឹងរុសគឺចាប់រថយន្តបញ្ជូនទៅសាខាខេត្ត ដើម្បីផាកពិន័យរថយន្ត១គ្រឿង ៥០០ដុល្លារតែម្តង Sic។
ផ្ទុយទៅវិញឆ្លើយតបទៅនឹងការលើកឡើនេះ លោក ថោង សុខាំភូ ប្រធានសាខាគយ និងរដ្ឋករខេត្តបន្ទាយមានជ័យ បានទូរស័ព្ទមកបំភ្លឺថា ការចោទប្រកាន់នេះ ពុំមែនជាការពិត គ្មានហេតុផល និងមូលដ្ឋានច្បាស់លាស់ទេ គឺ លោកគ្មានគោល ការណ៍ណាឱ្យអាជីវករបង់ពន្ធដាក់ខែនោះទេ។
ដោយឡែក មេគយ ថោង សុខាំភូ ក៏បានទទួលស្គាល់ ចំពោះចំណុចផ្លូវ៥០ លោកថា គឺជាកន្លែងសំចតរបស់គយចល័ត ព្រោះកាលមុនធ្វើជាគណៈកម្មការបង្ក្រាប ហើយចំណុចនេះក៏មិនមែន លោកទើបដាក់ប៉ុស្តិ៍ដែរ ។ មានន័យប្រឆាំង និងអភិបាលខេត្តឱ្យដកចេញ និងបានន័យថា គឺកុងត្រូលនេះកើតមាន គឺមានយូរហើយព្រោះពីមុនមាន២ទៅ៣កន្លែង គឺសាលាក្រហម និងផ្លូវ៥០ ពេលនេះលោកពង្រួញឱ្យមានតែ១កន្លែង។ ចំពោះការលើកឡើងរបស់អាជីវករថា ទំនិញបង់ពន្ធរថយន្តរួចហើយ ត្រូវបង់លុយក្រៅពី២០ទៅ៤០ម៉ឺនរៀលទៀត គឺគ្មានទេ សូមខាងព័ត៌មានទៅសួរអាជីវករនោះ ឱ្យច្បាស់ទៅ។ តែអាជីវករថា ពិតជាមានមែន គឺបង់ឱ្យក្រុមគយបើមិនជឿចង្អុលមុខក៏បានដែរ ។
ប្រភព អាជីវករម្នាក់ ជាអ្នកដឹកទំនិញពីជាយដែនប៉ោយប៉ែត ទៅលក់នៅខេត្តសៀមរាប បានសម្រេចចិត្តផ្អាកឈប់រកស៊ីមួយ រយៈ ព្រោះដោយសារលោករកស៊ីមិនសូវបាន ដោយសារគយផ្លូវ៥០ ភូមិកូនដំរី តម្រូវឱ្យបង់ខែក្នុង១រថយន្ត១៥០ដុល្លារ បើអ្នកបង់ក្បាលឡាន១ជើង១០ដុល្លារ(៤ម៉ឺនរៀល)។ រាល់ថ្ងៃ គយប្រើយុទ្ធសាស្ត្រឱ្យបង្កើតក្រុមមានម្នាក់ ជាតំណាង សម្រាប់ប្រមូលលុយឱ្យគេមុនរៀងរាល់ដើមខែ ក្រៅពីនេះនៅតាមផ្លូវជាតិលេខ៦ ក្នុងខេត្តសៀមរាប ៣កន្លែងទៀត ក៏បង់អីចឹងដែរ ធ្វើឱ្យពួកលោកដែលជាអាជីវកររកស៊ីកំប៉ិកកំប៉ុករត់មិនរួច ទើបសម្រេចចិត្តឈប់រកស៊ី ។
ពាក់ព័ន្ធនឹងបញ្ហាដ៏រសើបនេះ អភិបាលខេត្តបន្ទាយមានជ័យ លោក គោស៊ុំ សារឿត បានមានប្រសាសន៍ថា លោកមិនបានដឹង ថា មានគយចល័តខេត្តដាក់កុងត្រូលជជុះទេ លោកនឹងឱ្យមន្ត្រីចុះស្រាវជ្រាវបើពិតលោកនឹងមានវិធានការឱ្យដក ចេញជា បន្ទាន់។
គួររំលឹកថា កន្លងទៅលោក គោស៊ុំ សារឿត ធ្លាប់ឱ្យគយដាក់កន្លែងផ្លូវ៥០ គឺគោលបំណងទប់ស្កាត់រាល់ការលួចនាំចូលទំនិញ គេចពន្ធតាមច្រករបៀងរបស់ឈ្មួញ តែលោកបានបញ្ជាឱ្យដកចេញជាងកន្លះឆ្នាំហើយ ចំពោះការលួចដាក់កុងត្រូល ដែលគ្មានការអនុញ្ញាតពីអាជ្ញាធរ គឺជាកុងត្រូលខុសច្បាប់ ឬហៅថា កុងត្រូលជជុះ ។
ជុំវិញករណីមេ គយមានចេតនាគៃបំបាត់ពន្ធរដ្ឋធ្វើមានបានផ្ទាល់ខ្លួន និងបក្ខពួកនេះដែរ ជាការឆ្លើយតប លោក ស៊ុម ចាន់គា មន្ត្រីសម្របសម្រួលសិទ្ធិមនុស្សអាដហុកប្រចាំខេត្តបន្ទាយមានជ័យ បានចាត់ទុកថា ការតម្រូវឱ្យអាជីវករបង់ លុយខែរបស់ គយចល័យខេត្តចំណុចផ្លូវ៥០ គឺជាអំពើខុសច្បាប់ អង្គភាពប្រឆាំងអំពើរពុករលួយ គួរតែត្រួតពិនិត្យលើមន្ត្រីគយដែលឈរ ជើងចំណុចខាងលើផង និងមេសាខាគយ ថោង សុខាំភូ ព្រោះវាប៉ះពាល់ដល់ចំណូលរដ្ឋ ប៉ះពាល់ដល់ការអភិវឌ្ឍន៍ជាតិ បើមានមន្ត្រីខិលខូចទទួលលុយជាខែជាថ្ងៃ ឃុបឃិតឱ្យឈ្មួញនាំចូលទំនិញគេចពន្ធតាមអំពើចិត្តគ្មានការបង្ក្រាប បែបនេះ វាជាអំពើគៃលួចពន្ធរដ្ឋទាំងស្រុងហើយ។ ហើយដែលបញ្ហានេះមិនគួរ ឬក៏គួរតែមេប្រតិភូគយគុណ ញឹម និងរដ្ឋមន្ត្រីសេដ្ឋកិច្ច អូន ព័ន្ធមុន្នីរ័ត្ន និងអង្គភាពប្រឆាំងអំពើពុករលួយ មិនត្រូវព្រងើយកន្តើយនោះទេ ! ជៀសវាងគំរូអាក្រក់ដដែលៗ គួរតែមាន វិធានការក្តៅដាក់បុគ្គលព្រហើននេះចេញពីតំណែងទៅ ។
ប្រភព ពីក្រុមអាជីវកររកស៊ីបង់ពន្ធស្របច្បាប់ បានបង្ហើបឱ្យដឹងថា ពួកគាត់ពិតជាពិបាករកស៊ីខ្លាំង ព្រោះត្រូវបង់ពន្ធច្រើន ចំណាយពេលឱ្យគយត្រួតពិនិតឯកសារក៏យូរ ទំនិញទៅលក់លើទីផ្សារមិនទាន់ពេលវេលា រីឯកឈ្មួញរកស៊ីគេចពន្ធវិញពេលនេះមុខរីកដូចគ្រាប់ជី ព្រោះឈ្មួញទាំងនេះគេបង់លុយជាខែ និងបង់គិតក្បាលឡាន មិនចាំបាច់ត្រួតឈប់ឱ្យគយរុះរើទំនិញ និងពិនិត្យឯកសារនោះទេ ៕
