ខេត្តបាត់ដំបងៈ ថ្មីៗនេះមានរឿងរ៉ាវនៃការយករថយន្ដអង្គភាពរបស់រដ្ឋ ពាក់ស្លាកលេខក្រសួងអប់រំយុវជន និងកីឡា ទៅដឹកឈើប្រណីតខុសច្បាប់ធ្វើឱ្យមុខមាត់សាកលវិទ្យាល័យបាត់ដំបង អាប់យសដល់សាស្ដ្រាចារ្យ ក៏ដូចជាបុគ្គលិកសិក្សា ។ ដោយសារតែបញ្ហានេះ បុគ្គលិកសិក្សា និងសាស្ដ្រាចារ្យសាកលវិទ្យាល័យបាត់ដំបង ស្នើឱ្យលោករដ្ឋមន្ដ្រី ក្រសួងអប់រំ ដកតំណែងលោក អោ វុត្ថា ប្រធានការិយាល័យរដ្ឋបាល និងហិរញ្ញ វត្ថុនៃសាកលវិទ្យាល័យនេះ ។
ប្រភពព័ត៌មានបានឱ្យដឹងថា លោក អោ វុត្ថា ប្រធានការិយាល័យរដ្ឋបាល និង ហិរញ្ញវត្ថុបានប្រព្រឹត្ដបទល្មើសព្រហ្មទណ្ឌជាក់ស្ដែងដោយបានប្រើប្រាស់ទ្រព្យសម្បត្ដិ របស់រដ្ឋគឺរថយន្ដម៉ាកឡង់គ្រីស័រ ដែលជាអតីតជារថយន្ដរបស់សម្ដេចក្រឡាហោម ស ខេង ឧបនាយករដ្ឋមន្ដ្រី និងជារដ្ឋមន្ដ្រីក្រសួងមហាផ្ទៃ ហើយបច្ចុប្បន្នរថយន្ដ នេះបានបញ្ចូលជាសម្បត្ដិរដ្ឋ ក្រោមក្រសួងអប់រំយុវជន និងកីឡា ដែលបានប្រើ ប្រាស់ដោយសាកលវិទ្យាល័យបាត់ដំបងពាក់ស្លាកលេខ ១៦-២-០២៣៨ ។
កាលពីរាត្រីថ្ងៃទី២១ ខែកញ្ញា ឆ្នាំ២០១៥ រថយន្ដកម្មសិទ្ធិរបស់សាកលវិទ្យា ល័យបាត់ដំបងបើកបរដោយឈ្មោះ បូរ៉ា ក្រោមបង្គាប់បញ្ជាពីលោក អោ វុត្ថា បានប្រព្រឹត្ដល្មើសជាក់ស្ដែងរកស៊ីជួញដូរឈើប្រណីត ដែលខុសទៅនិងច្បាប់ព្រៃឈើ ហើយក៏ត្រូវបានរដ្ឋបាលព្រៃឈើខេត្ដបាត់ដំបងឃាត់បាន ក្នុងពេលកំពុងធ្វើដំណើរ ពីខេត្ដប៉ៃលិនចូលខេត្ដបាត់ដំបង ។ អាជ្ញាធរមានសមត្ថកិច្ចរឹបអូសរថយន្ដ និងឈើ ខុសច្បាប់ទាំងនោះទុកមួយកន្លែងដើម្បីដោះស្រាយ ។
ក្រុមមន្ដ្រីនៃសាកលវិទ្យាល័យបាត់ដំបងបាននិយាយថា វាជាភាពអាម៉ាស់មួយ ដែលប៉ះពាល់ដល់កិត្ដិយសសាកលវិទ្យាល័យ ។ ដូច្នេះក្រសួងអប់រំគួរចាត់វិធាន ការចំពោះបុគ្គល អោ វុត្ថា ដោយមិនត្រូវលើកលែងនោះឡើយ ៕
