ខេត្តកំពង់ធំ ៖ តាមសេចក្តីរាយការណ៏ពីប្រជាពលរដ្ឋនៅខេត្តកំពង់ធំបានប្រាប់ថាសកម្មភាពដឹកឈើប្រណីតបានធ្វើចរាចរណ៍ដូចគោហ្វូង តែពុំត្រូវបានសមត្ថកិច្ចមេព្រៃ ឬស្ថាប័ន មានអំណាច ចាត់វិធានការទប់ស្កាត់នោះទេ ជាក់ស្តែងចាប់តាំងពីលោក ហ៊ុន អៀង នាយអធិការដ្ឋបាលព្រៃឈើ ខាងជើងបឹងទន្លេសាប មកកាន់អំណាចពុំដែលឃើញចាប់ឈើបាន សូម្បីតែមួយដុំ ធ្វើឲ្យមានការរិះគន់ពីមហាជនថា លោកនាយអធិការរដ្ឋបាលព្រៃឈើ ខាងជើងបឹងទន្លេសាប ប្រហែលជាត្រូវថ្នាំសណ្តំហើយដឹងបានជាពុំមាន ការបង្ក្រាប ។
ទិដ្ឋភាពការដឹកជញ្ជូនបទល្មើសឈើគ្រញូង ត្រូវបានធ្វើសកម្មភាព ទាំងយប់ទាំងថ្ងៃ ក្នុងមួយថ្ងៃចាប់ពី ៥ទៅ ១០ឡាន តាមរយៈរថយន្តបាឡែន រថយន្តកូរ៉េ និងរថយន្តក្រុង ក្នុងនោះត្រូវបានគេស្គាល់ថា មានលោកអនុសេនីយ៍ឯក យ៉ាំ ប៉ូណា ( ហៅចិន ) ជាសមត្ថកិច្ចខេត្តកំពង់ធំ និងត្រូវបានលោក មេប្រគល់តួនាទីឲ្យខាងរត់ការឈើប្រណីត ដែលឆ្លង កាត់ខេត្តកំពង់ធំ ក្នុងភាគហ៊ុនរបស់លោក ចិន ដែលត្រូវបានគេដាក់ហាសនាមថា គាត់រស់ដោយសាររកស៊ីឈើ នោះមានឈ្មោះ លោក តឿ ដែលត្រូវបានគេស្គាល់ថា ជាអធិរាជឈើគ្រញូង ប្រចាំផ្លូវជាតិលេខ៦ កន្លងមក ធ្លាប់ដឹកឈើឆ្លងកាត់ខេត្តកំពង់ធំ ហើយសមត្ថកិច្ចចាប់បាន ក៏ឈានដល់ការប្រើប្រាស់អាវុធបាញ់ផ្អើលពេញ ក្រុងស្ទឹងសែន ត្រឹមតែមួយដង្ហើមចង្រិត ជាប់ឃុំមួយយប់រួចដោះលែងវិញដដែល ។
ចំណែកលោកអនុសេនីយ៍ឯក យ៉ាំ ប៉ូណា ( ហៅចិន ) បច្ចុប្បន្ន ពុំបានយកតួនាទីទៅបំរើប្រទេសជាតិនោះទេ បែរ ជាយកស្បែកជាសមត្ថកិច្ចមកបំរើការឲ្យឈ្មួញឈើឈ្មោះតឿ ហើយពុំមានខ្លាចញញើតពីច្បាប់នោះឡើយ ក្នុង នោះដែរ ត្រូវបានគេសង្ស័យថា សមត្ថកិច្ចមួយចំនួន ដែលត្រូវបានថ្នាំសណ្តំលោក (ចិន) មានសភាពស្ងប់ស្ងាត់ គេងអង្រឹងចាំទទួលលុយ ចំណែកអ្នកដែលពុំបានទទួលលាភសក្ការៈពីលោក ចិន ក៏មានការក្តៅក្រហាយ ដោយសារ តែលោកចិន គិតគូរតែថ្នាក់លើ ថា្នក់ក្រោមមើលរំលង ។
ចំណែកលោក ហ៊ុន អៀង នាយអធិការរដ្ឋបាលព្រៃឈើខាងជើងបឹងទន្លេសាប ពុំអាចធ្វើការទំនាក់ទំនងបានទេ តែបើចង់ជួបលោក វាពិបាកជាជាងទៅសុំភ្លើងយក្យទៅទៀត និងធ្វើឲ្យមានការរិះគន់ថា ឋានៈត្រឹមអ្នកកាសែត និង មន្ត្រីរាជការ កំប៉ិកកំប៉ុកគ្មានវាសនានឹងបានចូលជួបលោកទេ សូម្បីតែទូរស័ព្ទក៏មិនខ្ចីលើកដែរ ទើបបណ្តាលឲ្យ ពុំអាចសុំការបំភ្លឺជុំវិញ ការបណ្តែតបណ្តោយឲ្យមានចរាចរណ៍ឈើដូចគោហ្វូង ។
ពាក់ព័ន្ឋទៅនឹងបញ្ហាចោទប្រកាន់ថា លោកអនុសេនីយ៍ឯក យ៉ាំ ប៉ូណា ( ហៅចិន ) ជាសមត្ថកិច្ចរស់ដោយ សាររកស៊ីឈើនេះ ពុំអាចទំនាក់ទំនងបានទេ ដូច្នេះមហាជនបានសំណូមពរទៅថ្នាក់លើ ជួយស៊ើបអង្កេតលើ ករណីសកម្មភាព និងទង្វើរបស់លោក ចិន នាពេលបច្ចុប្បន្នផង ដើម្បីកុំឲ្យមន្ត្រីមួយចំនួនទៀតយកគំរូតាម ៕