ខេត្តព្រៃវែង ៖ក្រុមអ្នករកស៊ី ដឹកជញ្ជូនកសិផល សម្រាប់ទូកដែលមានចំណុះ ២០តោនពីតំបន់ផ្សេងៗចុះទៅប្រទេសវៀតណាមតាមច្រកបន្ទាយចក្រីនិងតាមផ្លូវទឹក ទន្លេមេគង្គ បានឲ្យដឹងថាបន្ទាប់ពីមានការកែទម្រង់ស៊ីជម្រៅ ពួកគាត់ត្រូវរងគ្រោះចូលបង់លុយឲ្យប៉ុស្តិ៍ជជុះ របស់សមត្ថកិច្ច កាន់តែច្រើនជាងពេលមុន។ជាពិសេសជំនាញគយ របស់លោក កាំង លាង បានតម្រូវឲ្យមានការបង់លុយក្នុងកម្រិតខ្ពស់ ជាងសមត្ថកិច្ច មកពីស្ថាប័នដទៃសម្រាប់ការដឹកជញ្ជូនផលកសិកម្ម ចុះទៅវៀតណាមឬការដឹកទំនិញទាំងស្របច្បាប់ និងបង់ពន្ធមិនគ្រប់ ចូលតាមច្រកបន្ទាយចក្រីក៏ដូចជាច្រករបៀង នៅក្បែរនោះជាពិសេសឈ្មួញ រកស៊ីដឹកឈើខុសច្បាប់និងគ្រឿងសំណង់ទ្រង់ទ្រាយធំ បានក្លាយជាមុខសញ្ញា របស់លោក កាំង លាង ។
ការកែទម្រង់ស៊ីជម្រៅលើការប្រមូលពន្ធគយ នៅក្នុងខេត្តព្រៃវែងហាក់ដូចជាមិនសូវ មានប្រសិទ្ធភាព ទេដោយសារតែលោក កាំង លាង ដែលទើបត្រូវបានតែងតាំងជាប្រធានសាខាគយ ខេត្តព្រៃវែងបានបិទភ្នែកឲ្យមន្ត្រីក្រោមឱវាទប្រព្រឹត្ត អំពើពុករលួយដាក់ប៉ុស្តិ៍ជជុះ គាបជំរិតឲ្យប្រជាពលរដ្ឋ ដឹកជញ្ជូនផលកសិកម្ម ចុះទៅលក់ឲ្យឈ្មួញ វៀតណាមនិងអ្នករកស៊ីដឹកទំនិញ មកពីប្រទេសវៀតណាម បង់លុយទៅតាមតម្លៃដែលបានកំណត់ និងគ្មានវិក្កយបត្រ ដែលទាមទារឲ្យ លោគ គុណ ញឹមជាអគ្គនាយកគយ និងរដ្ឋាករ ទើបឡើងតំណែងថ្មីគូរតែពិនិត្យមើលបញ្ហានេះឡើងវិញផង។
លោក លោក កាំងលាង ជាប្រធានសាខាគយ ខេត្តព្រៃវែង ឲ្យជួយសម្របសម្រួលក្នុងការនាំចូលទំនិញគ្រប់ប្រភេទ ដោយបង់ពន្ធមិនគ្រប់ដើម្បីសេសសល់ប្រាក់ មួយចំនួន យកទៅចាយវាយ បង់ឲ្យប៉ុស្តិ៍ជជុះនិងកូនចៅរបស់លោក កាំង លាង ដែលជួយសម្រួលឯកសារ លួចបន្លំពន្ធ។ក្នុងករណីដែលមិនព្រមបង់លុយ ទៅតាមការទាមទារនោះទេ កូនចៅរបស់លោក កាំងលាង បានរំខានឬបង្កបញ្ហាផ្សេងៗ នាំឲ្យខូចខាតទំនិញនិងខាតបង់ពេលវេលាផងដែរ ម្ល៉ោះហើយអ្នករកស៊ីមួយចំនួនមិនចង់មានរឿងវែងឆ្ងាយ ក៏ចេះតែបង់លុយ ទាំងទើសទាល់។
មានការបញ្ជាក់ផងដែរថា លោក កាំង លាង បានចាត់តាំងមន្ត្រីឲ្យបង្កើតប៉ុស្តិ៍ជជុះ នៅមុខស្នាក់ការ សាខាគយខេត្តព្រៃវែងដែលមានទីតាំង នៅជាប់ស្នាក់ការ គណបក្សប្រជាជន ក្នុងភូមិអ្នកលឿងឃុំអ្នកលឿង ស្រុកពាមរក៍ ខេត្តព្រៃវែង តម្រូវឲ្យទូកដឹកទំនិញគ្រប់ប្រភេទចូលបង់លុយ ទៅតាមទម្លាប់ពុករលួយ ឬទៅតាមការចរចាគ្នា។ករណីទូកដឹកទំនិញខ្លះ ដែលចូលបង់ពន្ធនៅច្រកក្អមសំណរលើទឹកដីខេត្តកណ្តាល ហើយបើកបរតាម ដងទន្លេមេគង្គ នឹងត្រូវកូនចៅរបស់លោកកាំង លាង កេណ្ឌប្រមូលឲ្យចូលបង់លុយ ឲ្យសាខាគយខេត្តព្រៃវែងម្តងទៀតតែបើមានការតវ៉ា អាចនឹងមានកោសរូស សុំត្រួតពិនិត្យឯកសារឬតម្រូវឲ្យបង្ហាញបែបបទផ្សេងៗ ដូចដែលក្រុមឈ្មួញមួយចំនួនបានលើកឡើងថា កូនចៅរបស់លោក កាំង លាង ធ្វើអ្វីតាមតែអំពើចិត្តមិនដែលខ្វល់ពីការខាតបង់ សន្លឹកឆ្នោត របស់គណបក្ស ប្រជាជនកម្ពុជានោះទេ។
ប្រជាពលរដ្ឋរកស៊ីដឹកជញ្ជូនកសិផល បាននិយាយគ្រប់ៗគ្នាថា លោក កាំង លាងមិនដែលខ្វល់ខ្វាយ ពីវិធានការរឹតបន្តឹង ឬការកែទម្រង់របស់អគ្គនាយកដ្ឋានគយ និងរដ្ឋាករនោះទេ គឺលោក កាំង លាង នៅតែចាត់តាំងឲ្យមានអំពើពុករលួយ ឲ្យក្រុមឈ្មួញនាំចូលទំនិញ បង់ពន្ធមិនគ្រប់ យ៉ាងអនាធិបតេយ្យដដែលព្រោះតំណែងរបស់គាត់ មិនមែនបានមក ដោយស្រួលៗនោះទេ ដូច្នេះរឿងសំខាន់គឺគាត់ត្រូវការស្រង់ដើមវិញ ៕
